బలమైన పాత్రల కోసం నిధి అగర్వాల్‌ ప్రయత్నం

వరుస సినిమాలు ఆశించిన స్థాయిలో విజయం సాధించకపోవడంతో నటి నిధి అగర్వాల్‌ తన కెరీర్‌లో కొత్త దారిని ఎంచుకుంటోంది. పవన్‌ కల్యాణ్‌తో ‘హరిహర వీరమల్లు’, ప్రభాస్‌తో ‘ది రాజాసాబ్‌’ వంటి భారీ చిత్రాల్లో నటించినప్పటికీ ఆమెకు ఆశించిన స్థాయిలో గుర్తింపు రాలేదు. స్టార్‌ హీరోలతో సినిమాలు చేసినా కెరీర్‌ ఊపందుకోకపోవడంతో ఇప్పుడు విభిన్నమైన కథలు, పాత్రలపై దృష్టి పెడుతోంది. ఇందులో భాగంగా లేడీ ఓరియంటెడ్‌ చిత్రంతో ప్రేక్షకులను పలకరించేందుకు సిద్ధమవుతోంది.

తాజా ఇంటర్వ్యూలో నిధి మాట్లాడుతూ.. సక్సెస్‌ అంటే ఎక్కువ సినిమాలు చేయడం కాదని, తనలోని నటనా ప్రతిభను నిరూపించుకుంటూ ఉన్నత స్థాయికి ఎదగడమే నిజమైన విజయమని తెలిపింది. దక్షిణాది చిత్ర పరిశ్రమలో తనకు సరైన గుర్తింపునిచ్చే శక్తివంతమైన పాత్రల కోసం ప్రయత్నిస్తున్నానని చెప్పింది. ముఖ్యంగా తమిళ సినిమాలు తన ప్రతిభను నిరూపించుకునేందుకు మంచి వేదికగా భావిస్తున్నానని, ప్రస్తుతం వాటిపైనే ఎక్కువగా దృష్టి సారిస్తున్నానని వెల్లడించింది. ప్రేక్షకుల మనసుల్లో చిరకాలం నిలిచిపోయే పాత్రలు చేయడమే తన లక్ష్యమని, భవిష్యత్తులో విభిన్నమైన ప్రాజెక్టులతో అలరించనున్నట్లు తెలిపింది.