‘వారణాసి’ ఓటీటీ హక్కులపై నెట్‌ఫ్లిక్స్ క్లారిటీ

దర్శకధీరుడు ఎస్‌.ఎస్‌. రాజమౌళి, సూపర్ స్టార్ మహేష్ బాబు కాంబినేషన్‌లో తెరకెక్కుతున్న ప్రతిష్టాత్మక చిత్రం ‘వారణాసి’ ఓటీటీ హక్కులపై గత కొద్ది రోజులుగా జోరుగా ప్రచారం సాగుతోంది. ఈ చిత్రం డిజిటల్ స్ట్రీమింగ్ హక్కులను నెట్‌ఫ్లిక్స్ దక్కించుకుందనే వార్తలు సినీ వర్గాల్లో చక్కర్లు కొట్టాయి. అయితే ‘సూపర్ సుబ్బు’ ప్రచార కార్యక్రమంలో పాల్గొన్న నెట్‌ఫ్లిక్స్ ఇండియా వైస్ ప్రెసిడెంట్ మోనికా షెర్గిల్ ఈ ప్రచారంపై స్పందిస్తూ, ప్రస్తుతం ఈ విషయంపై ఎలాంటి అధికారిక ప్రకటన లేదని స్పష్టం చేశారు.

‘వారణాసి’ చిత్రానికి సంబంధించిన డిజిటల్ హక్కులపై తాను ఎక్కడా ఎలాంటి సంకేతాలు ఇవ్వలేదని మోనికా షెర్గిల్ తెలిపారు. ప్రస్తుతం ఈ అంశంపై వ్యాఖ్యానించలేనని చెప్పడంతో, ఈ ప్రాజెక్ట్‌కు సంబంధించిన ఊహాగానాలకు తాత్కాలికంగా తెరపడింది. ఇదే సమయంలో దక్షిణాది సినిమాలపై నెట్‌ఫ్లిక్స్ మరింత దృష్టి సారిస్తున్న నేపథ్యంలో, భవిష్యత్తులో ఏయే భారీ చిత్రాలకు డిజిటల్ ఒప్పందాలు కుదురుతాయనే అంశంపై సినీ వర్గాల్లో ఆసక్తి నెలకొంది.