సంక్రాంతి మూవీలు అన్ని హిట్ కావాలి, తెలుగు పరిశ్రమ బాగుండాలి, మన శంకర వర ప్రసాద్ గారు ప్రీ రిలీజ్ ఈవెంట్ లో మెగాస్టార్ చిరంజీవి...

మెగాస్టార్ చిరంజీవి, హిట్ మెషిన్ అనిల్ రావిపూడి హోల్సమ్ ఫ్యామిలీ ఎంటర్‌టైన్‌మెంట్‌ 'మన శంకర వర ప్రసాద్ గారు' తో ప్రేక్షకులను అలరించబోతున్నారు. ఉత్సాహాన్ని మరింత పెంచుతూ విక్టరీ వెంకటేష్ కీలక పాత్రలో నటిస్తున్నారు. షైన్ స్క్రీన్స్, గోల్డ్ బాక్స్ ఎంటర్‌టైన్‌మెంట్స్ బ్యానర్‌లపై సాహు గారపాటి, సుస్మిత కొణిదెల నిర్మిస్తున్న ఈ చిత్రంలో నయనతార కథానాయికగా నటిస్తుండగా, శ్రీమతి అర్చన ఈ చిత్రాన్ని సమర్పిస్తున్నారు. సినిమా ప్రమోషన్‌లు అద్భుతంగా జరుగుతున్నాయి. ట్రైలర్, పాటలు సినిమా పై అంచనాలను భారీగా పెంచాయి. 'మన శంకర వర ప్రసాద్ గారు’ సంక్రాంతి కానుకగా ప్రపంచవ్యాప్తంగా  ఈ నెల12 న విడుదల కానుంది. ఈ సందర్భంగా మేకర్స్ గ్రాండ్ గా ప్రీరిలీజ్ ఈవెంట్ నిర్వహించారు.

ప్రీ రిలీజ్ ఈవెంట్ లో మెగాస్టార్ చిరంజీవి మాట్లాడుతూ.. మెగా ఫ్యాన్స్ అందరికీ హృదయపూర్వక నమస్కారం. అందరికీ నూతన సంవత్సర శుభాకాంక్షలు, ముందస్తుగా సంక్రాంతి శుభాకాంక్షలు. ఈ సంక్రాంతి కేవలం శంకర వరప్రసాద్ దే కాదు.. మొత్తం తెలుగు సినిమా పరిశ్రమది అవ్వాలని కోరుకుంటున్నాను. ప్రభాస్ రాజాసాబ్, నా తమ్ముడు రవితేజ సినిమా, మా ఇంట్లో చిన్నప్పుడు నుంచి సరదాగా తిరుగుతూ పెరిగిన శర్వానంద్ నారీ నారీ నడుమ మురారి, నన్ను గురువుగా భావిస్తూ నా శిష్యుడుగా ఉన్న నవీన్ సినిమా..అన్ని సినిమాలు ఈ సంక్రాంతికి సూపర్ హిట్ అవ్వాలని, తెలుగు చిత్రం పరిశ్రమ సుభిక్షంగా ఉండాలని ఆశిస్తున్నాను.అలంటి విజయాలు ప్రేక్షకులు ఇచ్చి తీరుతారనే ప్రగాఢ నమ్మకం నాకు ఉన్నది. 2026 సంక్రాంతి తెలుగు చిత్ర పరిశ్రమ మర్చిపోకూడదు. ప్రతి సినిమా పర్ఫెక్ట్ సంక్రాంతికి వచ్చే సినిమా, నచ్చే సినిమా. ఈ సంక్రాంతికి అన్ని సినిమాలు ఆడేలా చేసే బాధ్యత మీది, అన్ని సినిమాల్ని థియేటర్స్ కి వెళ్లి చూడండి. థియేటర్స్ లోనే ఆస్వాదించండి, ఆశీర్వదించండి.

రాఘవేంద్రరావు గారు అనిల్ రావిపూడి తో నేను సినిమా చేస్తే అదిరిపోతుందని గతంలో చెప్పారు. ఆయన చేతుల మీదుగానే ఈ సినిమాకు క్లాప్ కొట్టారు. అనిల్ కథలో ఫ్యామిలీ టచ్, సెంటిమెంట్, హార్ట్ టచ్చింగ్ సీన్స్ ఉంచి, సినిమాను వైవిధ్యంగా తీర్చిదిద్దారు. మేము ఈ సినిమాను చాలా సంతోషంగా, హోం వర్క్‌తో రూపొందించాము. షూటింగ్ ప్రతిరోజూ పిక్నిక్ లాగా సరదాగా జరిగింది. అనిల్ సానుకూల వాతావరణం కల్పించడంతో నా క్యారెక్టర్ కేక్ వాక్ లాగా సులభంగా వచ్చి, ఎడిటింగ్‌లో కూడా ఆయన జాగ్రత్తగా చూసారు.

ఈ సినిమా ఇప్పటికే సూపర్ హిట్ అయిపోయింది. నిర్దిష్ట బడ్జెట్, తక్కువ రోజుల్లో షూటింగ్ పూర్తి చేయడం సినిమాకు మొదటి విజయంగా నిలిచింది. విక్టరీ వెంకటేష్‌తో నటించడం చాలా ఎక్సైటింగ్ అనిపించింది. వెంకీ పాజిటివ్ వ్యక్తి, చర్చలలో స్ఫూర్తిదాయకంగా ఉంటాడు. మేము ఎన్నో సంవత్సరాల క్రితం అమెరికాలో కలిసి సినిమా చేయాలని కలిగిన ఆలోచన ఇప్పుడు అనిల్ ద్వారా నిజమైంది. మా కాంబినేషన్ అద్భుతంగా వచ్చింది, ఇది ప్రేక్షకులు థియేటర్లలో ఆస్వాదించాలి.

నయనతార కూడా కుటుంబ సభ్యురాల్లా కలిసి పనిచేసింది. నటీనటులు అందరూ అద్భుతంగా ప్రదర్శన ఇచ్చారు. బీమ్స్ సంగీతం ప్రత్యేక ఆకర్షణ, పాటలు, హుక్ స్టెప్ సాంగ్ ప్రేక్షకులను మక్కువ కలిగిస్తోంది. కెమెరామెన్ సమీర్ రెడ్డి వేగంగా, నాణ్యమైన పని చేసి సినిమాను 88 రోజుల్లో పూర్తిచేశాడు. ప్రొడక్షన్ డిజైన్, నిర్మాత సాహూ గారి మద్దతు సినిమాను మరింత మెరుగ్గా తీర్చిదిద్దింది. నా కూతురు సుస్మిత కూడా కష్టపడి పనిచేసి సినిమాను నిర్మాణంలో సహకరించింది. ఈ సినిమా ఖచ్చితంగా హిట్ అవుతుంది. అభిమానులు చూపిన ప్రేమ, స్ఫూర్తి, భగవంతుని ఆశీర్వాదంతో ప్రతీ ఒక్కరి కృషి విజయానికి దోహదపడుతుంది.