కేన్స్ వేదికగా లోకేష్ హంగామా...హీరోగా కొత్త సంచలనం!

తమిళ దర్శకుడు లోకేష్ కనగరాజ్ తన ప్రత్యేక యాక్షన్ చిత్రాలతో దేశవ్యాప్తంగా మంచి గుర్తింపు సంపాదించుకున్నారు. ఇప్పుడు దర్శకుడిగానే కాకుండా నటుడిగానూ ప్రేక్షకుల ముందుకు రావడానికి సిద్ధమవుతున్నారు. ఆయన ప్రధాన పాత్రలో నటిస్తున్న ‘డీసీ’ చిత్రం ప్రస్తుతం సినీ వర్గాల్లో ఆసక్తిని రేకెత్తిస్తోంది. ఈ చిత్రాన్ని అరుణ్ మాథేశ్వరన్ తెరకెక్కించగా, హింసాత్మక యాక్షన్ నాటకంగా రూపొందించారు. ఇప్పటికే చిత్రీకరణ పూర్తయిన ఈ సినిమా నుంచి తాజాగా కీలక ప్రకటన వెలువడింది. ఈ చిత్రానికి సంబంధించిన ప్రచార చిత్రాన్నిఈ నెల 15న అంతర్జాతీయ ప్రతిష్ఠాత్మక కేన్స్ చలనచిత్రోత్సవ వేదికపై విడుదల చేయనున్నట్లు చిత్ర బృందం ప్రకటించింది.

ఈ ప్రకటనతో సినిమాపై ఒక్కసారిగా భారీ చర్చ మొదలైంది. సాధారణంగా భారతీయ చిత్రాలకు కేన్స్ వేదికపై ప్రత్యేక గుర్తింపు రావడం అరుదుగా జరుగుతుండటంతో, ఈ అవకాశాన్ని చిత్ర బృందం ఎంతో ప్రతిష్ఠాత్మకంగా భావిస్తోంది. ఈ సినిమాలో వామికా గబ్బి, సంజన కృష్ణమూర్తి కీలక పాత్రల్లో నటిస్తున్నారు. సంగీతాన్ని అనిరుధ్ రవిచందర్ అందిస్తుండగా, సన్ పిక్చర్స్ భారీ స్థాయిలో చిత్రాన్ని నిర్మిస్తోంది. దర్శకుడిగా ఎన్నో విజయాలు అందుకున్న లోకేష్, నటుడిగా కూడా అదే స్థాయిలో ఆకట్టుకుంటాడా అనే ఆసక్తి అభిమానుల్లో కనిపిస్తోంది. ప్రచార చిత్రం విడుదల తర్వాత ఈ సినిమాపై అంచనాలు మరింత పెరిగే అవకాశముందని సినీ విశ్లేషకులు భావిస్తున్నారు.