కొత్త డైరెక్టర్ కు ఛాన్స్ ఇచ్చిన కిరణ్?

టాలీవుడ్ యువ నటుడు కిరణ్ అబ్బవరం వరుస విజయాలతో జోష్ మీదున్నారు. ‘క’, ‘కె-ర్యాంప్’, ‘చెన్నై లవ్ స్టోరీ’ వంటి చిత్రాలతో ప్రేక్షకులను ఆకట్టుకున్న ఆయన, నటుడిగానే కాకుండా ప్రస్తుతం ఓ సినిమాకు దర్శకత్వం కూడా వహిస్తున్నారు. గతంలో ‘తిమ్మరాజు పల్లి టీవీ’ చిత్రానికి నిర్మాతగా వ్యవహరించి, పూర్తిగా కొత్త నటీనటులు, సాంకేతిక నిపుణులకు అవకాశం కల్పించారు. ఆ సినిమా బాక్సాఫీస్ వద్ద ఆశించిన స్థాయిలో విజయం సాధించకపోయినా, కొత్త ప్రతిభను ప్రోత్సహించినందుకు కిరణ్ అబ్బవరంపై ప్రశంసలు వచ్చాయి.

తాజాగా కిరణ్ అబ్బవరం మరోసారి ఇదే తరహాలో కొత్త టాలెంట్‌ను ప్రోత్సహించేందుకు సిద్ధమవుతున్నట్లు తెలుస్తోంది. ఆయన సమర్పణలో పౌర్ణమి ఎంటర్‌టైన్‌మెంట్స్, క ప్రొడక్షన్స్ బ్యానర్లపై ఓ కొత్త సినిమాను నిర్మించనున్నట్లు సమాచారం. ఈ చిత్రం సస్పెన్స్ థ్రిల్లర్ కథాంశంతో తెరకెక్కనుందని, ఇందులోనూ పూర్తిగా కొత్తవారికే అవకాశాలు కల్పించనున్నట్లు టాక్ వినిపిస్తోంది. సినిమాకు సంబంధించిన పూర్తి వివరాలతో పాటు అధికారిక ప్రకటన త్వరలో వెలువడే అవకాశం ఉందని సినీ వర్గాల్లో చర్చ జరుగుతోంది.