కిరణ్ అబ్బవరం ‘రియాలిటీ’ టైటిల్ గ్లింప్స్ విడుదల

కిరణ్ అబ్బవరం తన రచన, దర్శకత్వ ప్రతిభను కూడా ఆవిష్కరించేందుకు సిద్ధమవుతున్న చిత్రం ‘రియాలిటీ’. తొలుత ‘కేఏ13’గా ప్రకటించినప్పటి నుంచే ఈ సినిమాపై ఆసక్తి నెలకొంది. తాజాగా చిత్రబృందం టైటిల్ గ్లింప్స్‌ను విడుదల చేసింది. ఇందులో కుటుంబాన్ని అన్నింటికంటే ముందుగా చూసే బాధ్యతాయుతమైన కథానాయకుడి పాత్రను పరిచయం చేశారు. కుటుంబ ఆర్థిక బాధ్యతలను తీర్చడంలోనే తనకు నిజమైన ఆనందం లభించేలా పాత్రను తీర్చిదిద్దినట్లు గ్లింప్స్‌ ద్వారా తెలుస్తోంది.

కుటుంబ బంధాలు, రోజువారీ జీవితంలోని సహజమైన భావోద్వేగాలతో సినిమా రూపొందుతున్నట్లు తెలుస్తోంది. కథానాయకుడి ప్రయాణానికి బలమైన సహాయ నటీనటులు మరింత లోతు తీసుకొచ్చారు. భీమ్స్‌ సిసిరియోలియో సంగీతం అందిస్తున్న ఈ చిత్రాన్ని సుధాకర్‌ చాగంటి భారీ స్థాయిలో నిర్మిస్తున్నారు. ప్రస్తుతం మచిలీపట్నంలో చిత్రీకరణ జరుగుతుండగా, ఈ షెడ్యూల్‌తో షూటింగ్‌ చివరి దశకు చేరుకోనుంది. క్రిస్మస్‌ కానుకగా డిసెంబర్‌ 25న సినిమా విడుదల కానుంది.