ఓవర్సీస్‌లో ‘కిల్లర్‌’కు భారీ బజ్‌

వైవిధ్యమైన కథాంశంతో తెరకెక్కుతున్న సైన్స్‌ ఫిక్షన్‌ యాక్షన్‌ థ్రిల్లర్‌ ‘కిల్లర్‌’ అంతర్జాతీయ విడుదల దిశగా మరో కీలక అడుగు వేసింది. ఈ సినిమా ఓవర్సీస్‌ డిస్ట్రిబ్యూషన్‌ హక్కులను ఓఎంజీ పిక్చర్స్ సొంతం చేసుకుంది. పూర్వాజ్‌ రచన, దర్శకత్వం, నిర్మాణంలో తెరకెక్కుతున్న ఈ చిత్రంలో జ్యోతి పూర్వజ్‌ ప్రధాన పాత్రలో నటిస్తున్నారు. సైన్స్‌ ఫిక్షన్‌, మిస్టరీ, యాక్షన్‌, థ్రిల్లర్‌, ఎమోషనల్‌ డ్రామా అంశాల కలయికగా రూపొందుతున్న ఈ చిత్రం అమెరికా, యూరప్‌, కెనడా, అరబ్‌ దేశాలు, మలేషియా, న్యూజిలాండ్‌, రష్యా తదితర ప్రాంతాల్లో విడుదల కానుంది.

‘కిల్లర్‌’లో జ్యోతి పూర్వజ్‌ రానియా, రక్తిక, జూలియా, సియా తదితర విభిన్న షేడ్స్‌తో పాటు ఏఐ ఆధారిత అవతార్‌లోనూ కనిపించనున్నారు. సినిమాకు వీఎఫ్‌ఎక్స్, సౌండ్‌ డిజైన్‌, బ్యాక్‌గ్రౌండ్‌ స్కోర్‌, విజువల్‌ వరల్డ్‌ బిల్డింగ్‌పై మేకర్స్‌ ప్రత్యేక దృష్టి పెట్టారు. ఇప్పటికే విడుదలైన ఓవర్సీస్‌ రైట్స్‌ పోస్టర్‌ సినిమాపై ఆసక్తిని పెంచుతోంది. థియేట్రికల్‌ రిలీజ్‌ డేట్‌ ప్రకటించిన తర్వాత మరిన్ని ఓవర్సీస్‌ ప్రాంతాలను కూడా చేర్చనున్నట్లు చిత్రబృందం తెలిపింది.