జ‌న నాయ‌గ‌న్‌ లీక్‌పై కమల్ హాసన్ సంచలన వ్యాఖ్యలు...

లోక నాయకుడు కమల్ హాసన్, జన నాయకన్ లీక్‌పై సంచలన వ్యాఖ్యలు చేశారు. విజయ్ హీరోగా నటించిన ఈ సినిమా జనవరి 9న విడుదల కావాల్సి ఉండగా, సెన్సార్ సమస్యల కారణంగా వాయిదా పడింది. అప్పటి నుంచి విడుదలపై స్పష్టత లేకపోయిన ఈ సమయంలో లీక్ అయిన సన్నివేశాలు పెద్ద కలకలం రేపాయి. ఈ ఘటనపై సినీ ప్రముఖులు స్పందిస్తూ విజయ్‌కు మద్దతుగా నిలిచారు. చిత్ర నిర్మాతలు లీక్ క్లిప్‌లను షేర్ చేస్తే చట్టపరమైన చర్యలు తప్పవని హెచ్చరించారు.

ఈ విషయంపై స్పందించిన కమల్ హాసన్, ఇది యాదృచ్ఛికంగా జరిగినది కాదని, వ్యవస్థ వైఫల్యం వల్లే జరిగిందని వ్యాఖ్యానించారు. సెన్సార్ ఆలస్యం పైరసీకి మార్గం సుగమం చేసిందని ఆయన అన్నారు. నటి పూజా హెగ్డే కూడా తీవ్ర ఆవేదన వ్యక్తం చేస్తూ, ఇది వేలాది మంది కృషిని దెబ్బతీసే చర్య అని పేర్కొన్నారు. రజనీకాంత్, చిరంజీవి, సూర్య వంటి అగ్ర తారలు ఈ ఘటనను ఖండిస్తూ, అభిమానులు థియేటర్లలోనే సినిమాను చూడాలని పిలుపునిచ్చారు. లీక్‌లకు కారణమైన వారిపై చట్టపరమైన చర్యలు ప్రారంభించామని నిర్మాతలు తెలిపారు.