రాజమౌళి ప్లాన్ మారిందా?.. హైదరాబాద్ నుంచి వారణాసికి షూట్ షిఫ్ట్!

సూపర్ స్టార్ మహేశ్ బాబు, దర్శకధీరుడు రాజమౌళి కాంబినేషన్‌లో తెరకెక్కుతున్న భారీ అడ్వెంచర్ సినిమాపై మరో ఆసక్తికర అప్‌డేట్ సినీ వర్గాల్లో చర్చనీయాంశంగా మారింది. ఈ చిత్రంలోని అండర్ వాటర్ యాక్షన్ సన్నివేశాల కోసం హైదరాబాద్‌లోని గగన్‌పహాడ్ ప్రాంతంలో భారీ నీటి ట్యాంక్ నిర్మించాలనే ప్లాన్ ఉన్నట్లు గతంలో వార్తలు వచ్చాయి. అయితే ప్రస్తుత వేసవి పరిస్థితులు, నీటి కొరత కారణంగా ఆ ప్రణాళికలో మార్పులు వచ్చినట్లు తెలుస్తోంది. షూట్ కోసం సుమారు 150 ట్యాంకర్ల నీరు అవసరమవుతుందని చిత్రబృందం అధికారులను సంప్రదించినప్పటికీ, అంత మొత్తంలో నీటిని అందించడం సాధ్యం కాదని సమాచారం.

దీంతో ఇప్పుడు కీలక సన్నివేశాలను వారణాసిలో చిత్రీకరించే దిశగా రాజమౌళి ఆలోచిస్తున్నారనే టాక్ వినిపిస్తోంది. గంగా నది తీరంలోని సహజ వాతావరణంలో షూట్ చేస్తే విజువల్స్ మరింత అద్భుతంగా వస్తాయని దర్శకుడు భావిస్తున్నారట. ఇప్పటికే ఈ చిత్రానికి అంతర్జాతీయ స్థాయి యాక్షన్ సన్నివేశాలు ప్లాన్ చేస్తున్నట్టు సమాచారం. హాలీవుడ్ టెక్నీషియన్లు కూడా ఈ ప్రాజెక్ట్‌లో భాగమవుతున్నారని ప్రచారం జరుగుతోంది. మరోవైపు ప్రియాంక చోప్రా హీరోయిన్‌గా నటించనున్నారనే వార్తలు అభిమానుల్లో ఆసక్తిని మరింత పెంచుతున్నాయి.