రెంటల్, శాతం విధానాలపై చర్చలు కొనసాగింపు

యాక్టివ్ తెలుగు ఫిల్మ్ ప్రొడ్యూసర్స్ గిల్డ్‌లో శాతం విధానంపై తీవ్ర విభేదాలు వ్యక్తమవుతున్నాయి. దిల్ రాజు నేతృత్వంలో ప్రారంభమైన ఈ గిల్డ్‌లో తొలిసారి విభజన స్పష్టంగా కనిపిస్తోంది. నిజాం ప్రాంతంలోని కొన్ని థియేటర్లు ఈ నెల 30 నుంచి శాతం విధానం అమలు చేయనున్నట్లు ప్రకటించగా, దీనికి వ్యతిరేకంగా 16 మంది నిర్మాతలు లేఖ రాశారు. ప్రస్తుతం ఉన్న రెంటల్ విధానాన్ని కొనసాగించాలని, ఎగ్జిబిటర్లతో చర్చలు జరపాలని వారు సూచించారు. ఈ లేఖలో దిల్ రాజు, సునీల్ నారంగ్ పేర్లు లేకపోవడం గమనార్హం.

శాతం విధానం అమలైతే తమ సినిమాలకు వచ్చే ఆదాయం తగ్గుతుందని నిర్మాతలు ఆందోళన వ్యక్తం చేస్తున్నారు. అయితే ఈ విధానం లేకపోతే థియేటర్లు నిలబడలేవని మరికొందరు అభిప్రాయపడుతున్నారు. అల్లు అరవింద్ కూడా ఈ విధానానికి మద్దతు ఇస్తున్నట్లు సమాచారం. పెద్ద సినిమాలు చేస్తున్న నిర్మాణ సంస్థలు ఈ మార్పును వ్యతిరేకిస్తుండగా, పరిశ్రమలో ఇప్పటికే ఉన్న సంక్షోభం మరింత పెరిగే అవకాశం ఉందని చెబుతున్నారు. దీంతో గిల్డ్‌లో తొలిసారిగా స్పష్టమైన విభేదాలు బయటపడ్డాయి.