శర్వా సరసన భాగ్యశ్రీ?

శర్వానంద్ హీరోగా దర్శకుడు శ్రీను వైట్ల తెరకెక్కించనున్న కొత్త చిత్రం గురించి సినీ వర్గాల్లో ఆసక్తికర చర్చ కొనసాగుతోంది. చాలా కాలం తర్వాత పూర్తి స్థాయి వినోదాత్మక కథతో ప్రేక్షకుల ముందుకు రావడానికి శ్రీను వైట్ల సిద్ధమవుతున్నట్లు సమాచారం. యాక్షన్, కామెడీ, భావోద్వేగాల సమ్మేళనంగా రూపొందుతున్న ఈ చిత్రంపై నిర్మాతలు కూడా భారీ నమ్మకంతో ఉన్నారు. సంక్రాంతి విడుదల లక్ష్యంగా ప్రణాళికలు రూపొందుతుండటంతో ప్రీ-ప్రొడక్షన్ పనులు వేగంగా కొనసాగుతున్నాయి.

తాజా కథనాల ప్రకారం ఈ చిత్రంలో కథానాయికగా భాగ్యశ్రీ బోర్సేను ఎంపిక చేసినట్లు టాలీవుడ్ వర్గాల్లో ప్రచారం జరుగుతోంది. అయితే దీనిపై అధికారిక ప్రకటన ఇంకా వెలువడలేదు. ఆగస్టు తొలి వారంలో మొదటి షెడ్యూల్ ప్రారంభమై కీలక సన్నివేశాల చిత్రీకరణ జరగనున్నట్లు సమాచారం. అనంతరం హీరో–హీరోయిన్‌ల మధ్య సాగే ప్రేమకథ ఎపిసోడ్లను తెరకెక్కించనున్నారు. చిన్ననాటి నిర్ణయం ఒక యువకుడి జీవితాన్ని ఎలా ప్రభావితం చేసిందనే అంశం కథలో ప్రధాన ఆకర్షణగా నిలవనుందని తెలుస్తోంది. మైత్రీ మూవీ మేకర్స్ నిర్మిస్తున్న ఈ చిత్రంతో మరోసారి విజయపథంలోకి రావాలని శ్రీను వైట్ల భావిస్తున్నట్లు సినీ వర్గాలు చెబుతున్నాయి.