జియో ఫైనాన్స్‌లో మెజారిటీ షేర్ కొన్న విదేశీ బ్యాంక్

జియో ఫైనాన్షియల్ సర్వీసెస్‌కు భారీ పెట్టుబడి రానుంది. బ్యాంక్ ఆఫ్ అమెరికా (BofA).. జియో ఫైనాన్షియల్ సర్వీసెస్‌కు చెందిన జియో క్రెడిట్ లిమిటెడ్‌లో గరిష్ఠంగా 49.9 శాతం వాటాను కొనుగోలు చేసేందుకు జాయింట్ వెంచర్ ఒప్పందం కుదుర్చుకుంది. ఈ డీల్ విలువ సుమారు ₹18,268 కోట్లు లేదా 1.92 బిలియన్ డాలర్లు. ఒప్పందం ప్రకారం తొలుత ప్రిఫరెన్షియల్ అలాట్‌మెంట్ ద్వారా 26.5 శాతం వాటాను BofA పొందనుంది. వారెంట్లను పూర్తిగా వినియోగిస్తే ఈ వాటా 49.9 శాతానికి చేరుతుంది.

భారత్‌లో వేగంగా అభివృద్ధి చెందుతున్న వినియోగదారుల రుణాలు, NBFC రంగంలోకి బ్యాంక్ ఆఫ్ అమెరికా ప్రవేశానికి ఈ భాగస్వామ్యం కీలకంగా మారనుంది. మరోవైపు జియో ఫైనాన్షియల్ సర్వీసెస్‌కు భారీ విదేశీ పెట్టుబడితో పాటు అంతర్జాతీయ స్థాయి బ్యాంకింగ్ సంస్థ అనుభవం లభించనుంది. జియో క్రెడిట్ రుణ వ్యాపారం కూడా వేగంగా విస్తరిస్తోంది. ఈ నేపథ్యంలో BofAతో భాగస్వామ్యం జియో ఫైనాన్స్ భవిష్యత్ విస్తరణకు మరింత ఊతమిస్తుందని భావిస్తున్నారు.