టాలీవుడ్‌లోకి మరో స్టార్ కిడ్...జోడీగా కొత్త హీరో

టాలీవుడ్‌ హీరో శ్రీకాంత్‌, మాజీ నటి ఊహల కుమార్తె మేధా మేకా కథానాయికగా సినీ రంగంలోకి అడుగుపెట్టేందుకు సిద్ధమయ్యారు. ప్రముఖ నిర్మాణ సంస్థ మైత్రీ మూవీ మేకర్స్‌ తెరకెక్కిస్తున్న ప్రేమకథా చిత్రంతో ఆమె హీరోయిన్‌గా పరిచయం కానున్నారు. తాజాగా చిత్ర బృందం ‘మైత్రీలవ్‌’ అనే హ్యాష్‌ట్యాగ్‌తో ఈ ప్రాజెక్ట్‌ను ప్రకటించి, మేధా మేకాతో పాటు నూతన నటుడు జై జస్తిని ప్రధాన జంటగా పరిచయం చేసింది. త్వరలోనే సినిమా టైటిల్‌ను వెల్లడిస్తామని, ప్రేక్షకుల మనసులను గెలుచుకునే ప్రేమకథను అందించబోతున్నామని మేకర్స్‌ తెలిపారు.

నవీన్‌ యెర్నేని, వై. రవిశంకర్‌ నిర్మాతలుగా, అనిల్‌ యెర్నేని సహ నిర్మాతగా ఈ చిత్రాన్ని నిర్మిస్తున్నారు. పృథ్వీ వనం దర్శకత్వం వహిస్తుండగా, ‘మిస్‌ శెట్టి మిస్టర్‌ పోలిశెట్టి’, ‘ఆంధ్ర కింగ్‌ తాలూకా’ చిత్రాలతో గుర్తింపు పొందిన మహేష్‌ బాబు పి. ఈ ప్రాజెక్ట్‌లో క్రియేటర్‌గా వ్యవహరిస్తున్నారు. మేధా గతంలో గుణశేఖర్‌ దర్శకత్వంలో వచ్చిన ‘రుద్రమదేవి’ చిత్రంలో అనుష్క శెట్టి చిన్ననాటి పాత్రలో నటించారు. ఇప్పుడు మైత్రీ మూవీ మేకర్స్‌ వంటి ప్రముఖ నిర్మాణ సంస్థ ద్వారా కథానాయికగా పరిచయం అవుతుండటంతో ఆమె తొలి సినిమా ఎలా ఉండబోతోందనే ఆసక్తి నెలకొంది.