క్రైమ్ థ్రిల్లర్‌తో ప్రగ్యా జైస్వాల్‌ రీఎంట్రీ

నందమూరి బాలకృష్ణ సరసన ‘అఖండ’, ‘డాకు మహారాజ్’ వంటి చిత్రాల్లో నటించి గుర్తింపు తెచ్చుకున్న ప్రగ్యా జైస్వాల్‌ మరోసారి వెండితెరపై సందడి చేసేందుకు సిద్ధమయ్యారు. టాలీవుడ్‌లో విజయవంతమైన చిత్రాల్లో నటించినప్పటికీ, ఆ తర్వాత ఆశించిన స్థాయిలో అవకాశాలు రాకపోవడంతో ఆమె సినీ ప్రయాణం కొంత నెమ్మదించింది. హిందీలోనూ 2024లో విడుదలైన ‘ఖేల్ ఖేల్ మే’ తర్వాత కొత్త ప్రాజెక్టులతో ప్రేక్షకుల ముందుకు రాలేదు. అయితే, సామాజిక మాధ్యమాల్లో చురుగ్గా ఉంటూ గ్లామరస్ ఫొటోలను పంచుకుంటూ అభిమానులతో నిరంతరం టచ్‌లో ఉంటున్నారు.

తాజాగా బాలీవుడ్ నటుడు సన్నీ డియోల్‌ నటిస్తున్న ‘సూర్య’ అనే క్రైమ్ థ్రిల్లర్‌లో ప్రగ్యా కీలక పాత్ర పోషించనున్నారు. ఎం. పద్మకుమార్ దర్శకత్వం వహిస్తున్న ఈ చిత్రం మలయాళంలో విజయం సాధించిన ‘జోసెఫ్’కు సీక్వెల్‌గా రూపొందుతోంది. కమల్ ముకుత్ నిర్మిస్తున్న ఈ సినిమాలో రవి కిషన్, మనీష్ వాధ్వా కూడా ముఖ్య పాత్రల్లో కనిపించనున్నారు. గతం, వర్తమానం మధ్య సాగే సంఘర్షణలో అసలు సత్యాన్ని వెలికితీసే కథాంశంతో ఈ చిత్రం తెరకెక్కుతోంది. ఈ సినిమాను నవంబర్ 20న ప్రపంచవ్యాప్తంగా థియేటర్లలో విడుదల చేయనున్నట్లు ప్రగ్యా ప్రకటించారు. ఈ చిత్రంతో బాలీవుడ్‌లో ఆమెకు మళ్లీ వరుస అవకాశాలు వస్తాయేమో చూడాలి.