టీవీకే చీఫ్, హీరో విజయ్ కి మరో షాక్

తమిళనాడులో అసెంబ్లీ ఎన్నికలు సమీపిస్తున్న నేపథ్యంలో ప్రముఖ సినీ నటుడు, తమిళగ వెట్రి కళగం (టీవీకే) అధినేత విజయ్‌కు మరో షాక్ తగిలినట్టుగా చర్చలు సాగుతున్నాయి. ఆయన కుమారుడు జాసన్ సంజయ్ తన పేరులో తండ్రి విజయ్‌ను సూచించే ‘వి’ అనే ఇన్షియల్‌ను తొలగించి, తల్లి సంగీత పేరులోని ‘ఎస్’ అనే అక్షరాన్ని ఉపయోగించినట్లు సామాజిక మాధ్యమాల్లో ప్రచారం జరుగుతోంది. సాధారణంగా తమిళ సినీ పరిశ్రమలో స్టార్ హీరోల పిల్లలు తమ తండ్రి పేరులోని మొదటి అక్షరాన్ని పేరులో ఉపయోగించడం ఆనవాయితీగా ఉంటుందని సినీ వర్గాలు చెబుతున్నాయి.

ఇటీవల ‘సిగ్మా’ అనే చిత్రంతో దర్శకుడిగా ఇండస్ట్రీలోకి అడుగుపెడుతున్న జాసన్ సంజయ్ తన టేకింగ్‌తో మంచి గుర్తింపు తెచ్చుకున్నట్లు సమాచారం. త్వరలోనే ఈ చిత్రం ప్రేక్షకుల ముందుకు రానుంది. ఇదే సమయంలో తన రెండో సినిమా పనులు ప్రారంభించిన జాసన్, ఆ చిత్ర టైటిల్ కార్డు మరియు సంతకంలో తండ్రి విజయ్ పేరుతో మొదలయ్యే ‘వి’ ఇన్షియల్‌ను తొలగించినట్లు కోలీవుడ్ వర్గాల్లో ప్రచారం జరుగుతోంది. తాజా రాజకీయ పరిణామాలు, విజయ్ వ్యక్తిగత జీవితంపై వస్తున్న వార్తల నేపథ్యంలో ఈ విషయం పెద్ద చర్చనీయాంశంగా మారింది.