'ఓం' మూవీ నుంచి మరో క్రేజీ అప్డేట్

ధనుష్, మమ్ముట్టి వంటి స్టార్లు నటిస్తున్న ప్రతిష్ఠాత్మక చిత్రం 'ఓం' నుంచి మరో ఆసక్తికరమైన అప్డేట్ వచ్చింది. ఈ సినిమాలో నటిస్తున్న శ్రీలీల పాత్రను, ఆమె లుక్‌ను చిత్ర బృందం మంగళవారం అధికారికంగా వెల్లడించింది. ఇందులో శ్రీలీల 'రోజా' అనే పాత్రలో కనిపించనున్నట్లు నిర్మాణ సంస్థ వండర్‌బార్ ఫిల్మ్స్ ప్రకటించింది. దీనికి సంబంధించిన 'సెంజుదరే' అనే పాటలోని చిన్న వీడియోను పంచుకుంటూ, ఈ పూర్తి పాట బుధవారం విడుదల కానుందని తెలిపింది.

ఇటీవల ఈ సినిమాలోని మరో హీరోయిన్ సాయి పల్లవి పాత్రను కూడా మేకర్స్ పరిచయం చేసిన సంగతి తెలిసిందే. ఇందులో సాయి పల్లవి 'నిత్య రెడ్డి' అనే ఐపీఎస్ అధికారిణి పాత్రలో నటిస్తున్నారు. ఆంధ్రప్రదేశ్ కేడర్‌కు చెందిన ఈ అధికారిణి, ఆ తర్వాత సీబీఐకి బదిలీపై వెళ్లి 'ఆపరేషన్ ఓం'ను నడిపించే కీలక పాత్రలో కనిపించనున్నారు. ఈ పాత్రను తనకు ఇచ్చినందుకు సాయి పల్లవి దర్శకుడు రాజ్‌కుమార్ పెరియసామికి ధన్యవాదాలు తెలిపారు.

రాజ్‌కుమార్ పెరియసామి దర్శకత్వం వహిస్తున్న ఈ చిత్రంలో తొలిసారిగా ధనుష్, మమ్ముట్టి కలిసి నటిస్తుండటంతో సినిమాపై భారీ అంచనాలు నెలకొన్నాయి. మలయాళ సూపర్ స్టార్ మమ్ముట్టి 'కార్తికేయన్' అనే శక్తివంతమైన పాత్రలో నటిస్తుండగా, ధనుష్ ఎర్రచందనం కూలీగా కనిపించనున్నారు. ఎర్రచందనం స్మగ్లింగ్ నేపథ్యంలో సాగే ఈ కథలో భారీ యాక్షన్ సన్నివేశాలు ఉంటాయని టైటిల్ టీజర్ స్పష్టం చేసింది.

ఈ చిత్రాన్ని నవంబర్ 20న ప్రపంచవ్యాప్తంగా విడుదల చేయనున్నట్లు నిర్మాతలు ప్రకటించారు. వాస్తవానికి అక్టోబర్ 16న విడుదల చేయాలని భావించినా, రజినీకాంత్ 'జైలర్ 2' సినిమాకు గౌరవంగా వాయిదా వేశారు. ధనుష్ కెరీర్‌లోనే భారీ బడ్జెట్ చిత్రాల్లో ఒకటిగా నిలుస్తున్న ఈ సినిమాలో ప్రముఖ బాలీవుడ్ నటుడు నసీరుద్దీన్ షా కూడా కీలక పాత్ర పోషిస్తున్నారు. 'ఓం: చాప్టర్ 1' అనే టైటిల్ చూస్తుంటే, ఈ సినిమాకు సీక్వెల్ కూడా ఉండే అవకాశం కనిపిస్తోంది. సాయి అభ్యంక్కర్ ఈ చిత్రానికి సంగీతం అందిస్తున్నారు.