అఖిల్‌కు అభిమాని కొత్త పేరు..'నాగ అఖిల్' పేరు వెనుక ఇంత కథ ఉందా?

అక్కినేని యువ హీరో అఖిల్ నటించిన ‘లెనిన్’ సినిమా ఈ నెల 10న విడుదలకు సిద్ధమవుతోంది. మురళీ కిషోర్ అబ్బూరు దర్శకత్వంలో తెరకెక్కిన ఈ చిత్రానికి ప్రచార కార్యక్రమాలు జోరుగా సాగుతున్నాయి. తిరుపతిలో జరిగిన ప్రీ-రిలీజ్ ఈవెంట్ అభిమానుల సందడితో అట్టహాసంగా జరిగింది. ఈ వేడుకలో అఖిల్, నాగార్జున ప్రసంగాల కంటే ఓ అభిమాని చేసిన వినూత్న ప్రతిపాదన అందరి దృష్టిని ఆకర్షించింది.

అఖిల్ పేరును ‘నాగ అఖిల్’గా మార్చాలని సూచించిన ఆ అభిమాని దాని వెనుక ఉన్న సెంటిమెంట్‌ను వివరించి అందరినీ ఆకట్టుకున్నాడు. ‘నాగ’ అనే పదం తాత నాగేశ్వరరావు, తండ్రి నాగార్జున పేర్ల నుంచి, ‘అ’ అక్షరం నానమ్మ అన్నపూర్ణమ్మ, తల్లి అమల పేర్ల నుంచి తీసుకున్నదని తెలిపాడు. ఈ ఆలోచనకు సభలో ఘన స్వాగతం లభించగా, సోషల్ మీడియాలో కూడా భారీ స్పందన వస్తోంది.