ప్రపంచవ్యాప్తంగా గ్రాండ్ రిలీజ్‌కు సిద్ధమైన “ఎ బ్యూటిఫుల్ బ్రేకప్”

తక్ష్, మటిల్డా ప్రధాన పాత్రల్లో నటించిన ఇంగ్లీష్ ఫీచర్ ఫిల్మ్ “ఎ బ్యూటిఫుల్ బ్రేకప్” ఒక ట్రెండ్ సెట్టింగ్ రొమాంటిక్ హారర్ థ్రిల్లర్. ప్రతిభావంతుడైన దర్శకుడు అజిత్ వాసన్ ఉగ్గిన రచన, దర్శకత్వంలో రూపొందిన ఈ చిత్రాన్ని 5 నేచర్స్ మూవీస్ ఇంటర్నేషనల్ నిర్మించగా, ముద్రగడ రంగారావు, ఉగ్గిన సత్యనారాయణరావు సమర్పిస్తున్నారు. గ్లోబల్ ఆడియెన్స్‌ను లక్ష్యంగా పూర్తిగా ఇంగ్లీష్‌లో తెరకెక్కించిన ఈ చిత్రం ఈ నెల 13న ప్రపంచవ్యాప్తంగా గ్రాండ్ థియేట్రికల్ రిలీజ్‌కు సిద్ధమవుతోంది. విడుదలకు ముందుగా 12న దుబాయ్‌లో ఎక్స్‌క్లూజివ్ ప్రీమియర్ నిర్వహించనున్నారు. అనంతరం హిందీ, తెలుగు, తమిళ, కన్నడ, మలయాళ భాషల్లో డబ్ చేసి విడుదల చేయాలని చిత్రబృందం ప్రణాళికలు సిద్ధం చేసింది. దర్శకుడు అజిత్ వాసన్ ఉగ్గిన మాట్లాడుతూ, ఈ చిత్రానికి ప్రధాన బలం సంగీతమని, లెజెండరీ సంగీత దర్శకుడు మాస్ట్రో ఇళయరాజా అందించిన ఆర్కెస్ట్రల్ స్కోర్ సినిమాకు ఆత్మ, భావోద్వేగం, టైమ్‌లెస్ గ్రాండ్యూర్‌ను అందించిందని తెలిపారు. ద్వేషం లేకుండానే ఒక జంట సంతోషంగా విడిపోవచ్చనే మానవీయ భావనతో ఈ భావోద్వేగ హారర్ థ్రిల్లర్‌ను రూపొందించినట్లు చెప్పారు.

హీరో తక్ష్ మాట్లాడుతూ, చిత్ర షూటింగ్‌లో ప్రధాన భాగం కర్ణాటకలోని చిక్కమగళూరు అరణ్య ప్రాంతంలోని ప్రశాంతమైన ఎస్టేట్‌లో జరిగినట్లు తెలిపారు. మబ్బులతో నిండిన సహజ వాతావరణం సినిమాకు భయానకమైనా అందమైన అనుభూతిని అందించిందని చెప్పారు. సినిమాటోగ్రఫీ చిత్రానికి ప్రధాన ఆకర్షణగా నిలిచిందని, డైరెక్టర్ ఆఫ్ ఫోటోగ్రఫీ గుణశేఖరన్ విజువల్స్‌ను అద్భుతంగా తీర్చిదిద్దారని వెల్లడించారు. మాస్ట్రో ఇళయరాజా పూర్తి సింఫనీ ఆర్కెస్ట్రాతో, అంతర్జాతీయంగా ప్రసిద్ధి చెందిన బో టై ఆర్కెస్ట్రాతో కంపోజ్ చేసిన సంగీతం చిత్రంలోని రొమాంటిక్, సూపర్‌నేచురల్ అంశాలను మరింత ఎలివేట్ చేసిందన్నారు. యూకేలో కలర్ గ్రేడింగ్ చేసి హాలీవుడ్ స్థాయి ఫినిష్ తీసుకువచ్చినట్లు, ఎడిటర్ శ్రీకాంత్, సౌండ్ డిజైనర్ రాజన్ తమ ప్రతిభతో చిత్రానికి లోతు జోడించినట్లు చెప్పారు. ఇది సాధారణ హారర్ సినిమా కాదని, సూపర్‌నేచురల్ ఎలిమెంట్‌ను పవిత్రమైన ఆత్మగా చూపించామని, నిజ జీవిత సంఘటన ఆధారంగా కల్పనతో మేళవించి రూపొందించామని వివరించారు.

ఈ ప్రయాణంలో తనకు తోడుగా నిలిచిన ఎగ్జిక్యూటివ్ ప్రొడ్యూసర్ రవి బర్నబాస్, రిలీజ్ ప్లాన్‌కు మార్గనిర్దేశం చేసిన దుబాయ్ చౌదరీ, సహనటి మటిల్డా బాజర్, సాంకేతిక బృందం సభ్యులందరికీ తక్ష్ కృతజ్ఞతలు తెలిపారు. దర్శకుడు అజిత్ వాసన్ ఉగ్గినతో కలిసి సినిమా కోసం శ్రమించిన ప్రతి నటుడు, సాంకేతిక నిపుణుడు, క్రూ సభ్యుడికి ధన్యవాదాలు తెలియజేశారు. అంతర్జాతీయ విడుదల ప్రణాళికల భాగంగా తొలి థియేట్రికల్ రిలీజ్ అనంతరం ఇండోనేషియా, ఫిలిప్పీన్స్, జపాన్, యూకే, యూఎస్‌ఏ, కెనడా, కరీబియన్ దేశాలు మరియు స్పానిష్ మాట్లాడే ప్రధాన ప్రాంతాల్లో దశలవారీగా విడుదల చేయాలని చిత్రబృందం వ్యూహాత్మకంగా ప్రణాళికలు రూపొందించింది. “ఎ బ్యూటిఫుల్ బ్రేకప్” అందరి సమిష్టి కృషి ఫలితంగా ప్రపంచవ్యాప్తంగా ప్రేక్షకులను ఆకట్టుకునేందుకు సిద్ధంగా ఉంది.