గుడ్డు పూర్తిగా తినాలి..పచ్చసొనలోనే అసలైన పోషకాలు - డాక్టర్ ఆలోక్ చోప్రా

గుడ్డు అనగానే చాలా మందికి ప్రోటీన్ గుర్తుకు వస్తుంది. అయితే గుడ్డులోని పచ్చసొన తినాలా వద్దా అన్న సందేహం చాలాకాలంగా ఉంది. పచ్చసొన తింటే కొలెస్ట్రాల్ పెరిగి గుండెపోటు వస్తుందని ఒక ప్రచారం ఉన్నప్పటికీ, ఆధునిక పరిశోధనలు దీనిని ఖండిస్తున్నాయి. ప్రముఖ కార్డియాలజిస్ట్ డాక్టర్ ఆలోక్ చోప్రా ప్రకారం, పచ్చసొనను దూరం చేయడం అంటే విలువైన పోషకాలను వదులుకోవడమే. మన శరీరంలోని కొలెస్ట్రాల్‌లో సుమారు 85 శాతం కాలేయం స్వయంగా తయారు చేస్తుంది, ఆహారం ద్వారా వచ్చే ప్రభావం తక్కువగా ఉంటుంది. పచ్చసొనలో విటమిన్ A, విటమిన్ E, ఒమేగా-3 ఫ్యాటీ యాసిడ్స్ సమృద్ధిగా ఉంటాయి. కేవలం ఎగ్ వైట్ మాత్రమే తీసుకోవడం వల్ల ఇన్ఫ్లమేషన్ పెరిగే అవకాశం ఉండగా, పచ్చసొనతో కలిపి తీసుకున్నప్పుడే గుడ్డు పూర్తి స్థాయి పోషకాహారంగా మారుతుంది.

కొలెస్ట్రాల్ అనగానే దానిని చెడ్డదిగా భావిస్తాం. కానీ హార్మోన్ల ఉత్పత్తి, మెదడు పనితీరు, రోగనిరోధక శక్తి కోసం ఇది అవసరం. గుడ్డులోని కొలెస్ట్రాల్ రక్తంలోని కొలెస్ట్రాల్‌ను ప్రమాదకరంగా పెంచుతుందని భయపడాల్సిన అవసరం లేదు. ఆహారం ద్వారా కొలెస్ట్రాల్ తీసుకున్నప్పుడు శరీరం తన సొంత తయారీని తగ్గించి సమతుల్యం చేస్తుంది. పైగా కొలెస్ట్రాల్ పెరిగినా అది ఎక్కువగా హెచ్‌డీఎల్ (HDL) అనే మంచి కొలెస్ట్రాల్‌ను పెంచుతుంది, ఇది గుండె ఆరోగ్యానికి మేలు చేస్తుంది.

గుండెకు హానికరమైనది గుడ్డు కాదు ట్రాన్స్ ఫ్యాట్స్, అధిక సాచురేటెడ్ ఫ్యాట్స్, వ్యాయామం లేకపోవడం, ధూమపానం, జన్యుపరమైన కారణాలే ఎల్‌డీఎల్ పెరుగుదలకు కారణాలు. కాబట్టి సమతుల్య ఆహారంలో భాగంగా గుడ్డును పూర్తిగా తీసుకోవడం సాధారణంగా ముప్పుకరమేమీ కాదు అని నిపుణులు చెబుతున్నారు. అయితే ఇప్పటికే గుండెజబ్బులు, డయాబెటిస్, గౌట్ ఉన్నవారు లేదా ‘హైపర్-రెస్పాండర్స్’ వైద్యుల సలహా తీసుకోవాలి. ఆరోగ్యవంతులు రోజుకు ఒకటి లేదా రెండు గుడ్లను పచ్చసొనతో సహా తీసుకోవచ్చు.

గమనిక: ఇక్కడ ఇచ్చిన సమాచారం కేవలం అవగాహన కోసం మాత్రమే. దీనికి మేము ఎలాంటి బాధ్యత వహించము. ఏవైనా ఆరోగ్య సమస్యలు ఉంటే తప్పనిసరిగా వైద్యుడిని లేదా న్యూట్రిషనిస్ట్‌ను సంప్రదించి వారి సలహా మేరకు అనుసరించండి.