చిరు ఓదెల సినిమాపై క్లారిటీ ఇదే?

మెగాస్టార్ చిరంజీవి, దర్శకుడు శ్రీకాంత్ ఓదెల కలయికలో రాబోతున్న సినిమా గురించి కొంతకాలంగా సోషల్ మీడియాలో రకరకాల వార్తలు చక్కర్లు కొడుతున్నాయి. ముఖ్యంగా ఈ ప్రాజెక్టు నిలిచిపోయిందంటూ వస్తున్న ప్రచారానికి తాజాగా భిన్నమైన సమాచారం తెరపైకి వచ్చింది. #NBK112 తర్వాత ఇప్పుడు #ChiruOdela సినిమాను కూడా కొందరు కావాలనే లక్ష్యంగా చేసుకుని తప్పుడు కథనాలు ప్రచారం చేస్తున్నారని అభిమానులు ఆరోపిస్తున్నారు. ఈ రెండు సినిమాల వెనుక ఒకే నిర్మాణ సంస్థ ఎస్‌ఎల్‌వీ సినిమాస్ ఉండటంతో ఈ ప్రచారంపై మరింత చర్చ జరుగుతోంది. అయితే శ్రీకాంత్ ఓదెలకు అత్యంత సన్నిహితంగా ఉండే వ్యక్తి ఇచ్చిన సమాచారం ప్రకారం.. చిరంజీవి స్వయంగా దర్శకుడిని తన ఇంటికి ఆహ్వానించి సినిమా స్క్రిప్ట్ పురోగతిపై చర్చించినట్లు తెలుస్తోంది.

ముఖ్యంగా 'ది ప్యారడైజ్' సినిమాకు ఎదురైన ప్రతికూల పరిస్థితులతో శ్రీకాంత్ ఓదెల కొంత నిరాశలో ఉన్న సమయంలో చిరంజీవి ఆయనకు ధైర్యం చెప్పారట. ప్రాజెక్టు కొనసాగుతుందని పూర్తి భరోసా ఇచ్చి, వీలైనంత త్వరగా కథను సిద్ధం చేసి మరోసారి కలవాలని సూచించినట్లు సమాచారం. ఇప్పటికే రచయితల బృందం ఈ సినిమా కథపై పనిచేస్తోందని ప్రచారం జరుగుతోంది. జూన్ 15న వెల్లడైన సమాచారం కూడా ఇదే విషయాన్ని సూచిస్తోంది. అయితే నిర్మాణ సంస్థ విషయంలో మాత్రం మార్పు ఉండే అవకాశం ఉందని టాక్. 'ది ప్యారడైజ్' ఫలితం నేపథ్యంలో ఈ అంశాన్ని మరోసారి పరిశీలించవచ్చని తెలుస్తోంది.