ఫేక్ రాయుళ్లకు జేసన్ సంజయ్ వార్నింగ్?

తమిళనాడు రాజకీయాల్లో ముఖ్యమంత్రి విజయ్ పేరు ప్రస్తుతం హాట్ టాపిక్‌గా మారిన వేళ.. ఆయన కుటుంబానికి సంబంధించిన మరో వార్త చర్చనీయాంశంగా మారింది. విజయ్ కుమారుడు జేసన్ సంజయ్ తన పేరుతో సోషల్ మీడియాలో కొనసాగుతున్న నకిలీ ఖాతాలపై తీవ్రంగా స్పందించారు. తన అధికారిక సామాజిక మాధ్యమ ఖాతాలు ఏవో స్పష్టంగా తెలియజేస్తూ ఒక ప్రకటన విడుదల చేసినట్లు సమాచారం. తన పేరుతో నిర్వహిస్తున్న కొన్ని అభిమాన సంఘాలు, ఇతర పేజీలకు తన అనుమతి లేదని ఆయన స్పష్టం చేశారు. తన ఆధ్వర్యంలో ఉన్నవి, తన అనుమతితో నిర్వహిస్తున్నవి మాత్రమే అధికారిక ఖాతాలుగా గుర్తించాలని సూచించారు. మిగిలిన వాటితో తనకు ఎలాంటి సంబంధం లేదని తేల్చిచెప్పారు. ఈ ప్రకటన ఇప్పుడు సోషల్ మీడియాలో ఆసక్తిని రేకెత్తిస్తోంది.

ముఖ్యంగా తన పేరు, ఫొటో, వ్యక్తిగత గుర్తింపును ఉపయోగించుకుని ఇతర ఖాతాలు నడిపేవారిపై ఆయన హెచ్చరికలు జారీ చేశారు. అధికారికంగా ప్రకటించిన ఖాతాల్లో లేని ఇతర పేజీలు, ప్రొఫైల్స్ నుంచి వచ్చే పోస్టులు, కామెంట్లు, వ్యక్తిగత సందేశాలు తనకు సంబంధించినవి కావని స్పష్టం చేశారు. అంతేకాకుండా అలాంటి ఖాతాల ద్వారా జరిగే వ్యాపార లావాదేవీలు, ఇతర వ్యవహారాలకు కూడా తనకు ఎలాంటి బాధ్యత ఉండదని పేర్కొన్నట్లు తెలుస్తోంది. తన పేరుతో ఎవరైనా తప్పుడు ప్రచారం చేసినా, ఇతరులను సంప్రదించినా వాటిని నమ్మవద్దని పరోక్షంగా సూచించారు. ఇటీవల ప్రముఖుల పేర్లతో నకిలీ ఖాతాలు పెరుగుతున్న నేపథ్యంలో జేసన్ సంజయ్ తీసుకున్న ఈ నిర్ణయం ప్రాధాన్యత సంతరించుకుంది.