యూట్యూబర్ నందన కేసులో మరో కీలక మలుపు.. గడువుకు ముందే పోలీసుల ఎదుట హాజరు

యూట్యూబర్ నందన మంగళవారం సాయంత్రం ఎన్టీఆర్ జిల్లా ఇబ్రహీంపట్నం పోలీస్‌స్టేషన్‌లో పోలీసుల ఎదుట హాజరయ్యారు. పోలీసుల ఆదేశాల ప్రకారం ఆమె ఈ నెల 16లోగా స్టేషన్‌కు రావాల్సి ఉండగా.. గడువుకు ఒకరోజు ముందుగానే మంగళవారం హాజరై విచారణకు సహకరించారు.

విదేశాల్లో ఉద్యోగాలు ఇప్పిస్తామంటూ పలువురిని మోసం చేశారనే ఆరోపణలు నందన, ఆమె భర్తపై ఉన్నాయి. బాధితుల ఫిర్యాదుల మేరకు ఇబ్రహీంపట్నం పోలీస్‌స్టేషన్‌లో కేసు నమోదైంది. ఈ విషయం వెలుగులోకి వచ్చిన తర్వాత నందన దంపతులు అజ్ఞాతంలోకి వెళ్లడంతో ఏపీ పోలీసులు లుక్‌అవుట్‌ సర్క్యులర్‌ జారీ చేశారు. ఈ నేపథ్యంలో నందన సోమవారం బ్రిటిష్ ఎయిర్‌వేస్ విమానంలో ఒంటరిగా విదేశాల నుంచి శంషాబాద్‌ విమానాశ్రయానికి చేరుకున్నారు. పాస్‌పోర్ట్, వీసా పత్రాలను తనిఖీ చేసిన ఇమిగ్రేషన్ అధికారులు ఎల్‌వోసీ ఆధారంగా ఆమెను అదుపులోకి తీసుకుని ఇబ్రహీంపట్నం పోలీసులకు అప్పగించారు.