బొక్కసంపాళెం మహిళల సంకల్పం.. జాతీయ స్థాయికి చేరిన గ్రామ విజయం!

తిరుపతి జిల్లా శ్రీకాళహస్తి మండలంలోని బొక్కసంపాళెం గ్రామ మహిళలు ఐక్యత, పట్టుదలతో అద్భుత విజయగాథ సృష్టించారు. ఒకప్పుడు పొరుగు గ్రామాలకు కూలి పనులకు వెళ్లిన మహిళలు నేడు ఆర్థికంగా స్వయం సమృద్ధి సాధించారు. గ్రామంలోని సుమారు 230 మంది మహిళలు 17 స్వయం సహాయక సంఘాలు ఏర్పాటు చేసుకుని రుణాల సహాయంతో పాడి పరిశ్రమ, టైలరింగ్, కలంకారీ, సబ్బుల తయారీ వంటి ఉపాధి రంగాల్లో అడుగుపెట్టారు. పాల ఉత్పత్తులతో పాటు ఇతర ఉత్పత్తులను సమీప గ్రామాలు, శ్రీకాళహస్తి పట్టణంలో విక్రయిస్తూ కుటుంబాలకు ఆదాయ వనరులు సృష్టించారు. గ్రామాభివృద్ధి, సుపరిపాలనలో మహిళల భాగస్వామ్యాన్ని గుర్తించిన అధికారులు ఈ విజయగాథను కేంద్రానికి పంపగా, జాతీయ స్థాయి గుర్తింపుతో పాటు గ్రామానికి రూ.1 కోటి నిధులు మంజూరయ్యాయి.

ఆధునిక సాంకేతికతను కూడా ఈ మహిళలు సమర్థంగా వినియోగించుకుంటున్నారు. ముగ్గురు మహిళలు యూట్యూబ్ ద్వారా వాషింగ్ మెషీన్ లిక్విడ్ తయారీ నేర్చుకుని, హైదరాబాద్‌లో శిక్షణ తీసుకుని స్వంత స్టార్టప్ ప్రారంభించారు. ప్రస్తుతం ఇళ్లతో పాటు హోటళ్లు, ఆసుపత్రులకు కూడా లిక్విడ్ సరఫరా చేస్తూ నెలకు రూ.15 వేల వరకు ఆదాయం పొందుతున్నారు. ఆర్థిక స్వావలంబనతో గ్రామంలో సామాజిక మార్పులు కూడా వచ్చాయి. ఒకప్పుడు బాల్య వివాహాలు జరిగే పరిస్థితి ఉండగా, ఇప్పుడు ఆడపిల్లల విద్యకు ప్రాధాన్యం పెరిగింది. గ్రామంలో ఏర్పాటు చేసిన మోడల్ స్కూల్‌కు చుట్టుపక్కల గ్రామాల నుంచి విద్యార్థులు వస్తున్నారు. మహిళా సాధికారత, నైపుణ్యాభివృద్ధి, మరిన్ని ఉపాధి అవకాశాల కోసం రూ.1 కోటి నిధులను వినియోగించాలని గ్రామపంచాయతీ నిర్ణయించింది.