చంద్రపూర్‌లో మళ్లీ ఏనుగుల సంచారం

మహారాష్ట్రలోని చంద్రపూర్ జిల్లాలోకి మరోసారి అడవి ఏనుగుల గుంపు ప్రవేశించింది. గడ్చిరోలి నుంచి వైనగంగా నది దాటి సావ్లీ తాలూకాలోకి వచ్చిన ఏనుగులు కరోలి, అకాపూర్, గేవర గ్రామాల పరిసరాల్లో సంచరిస్తున్నాయి. ఏనుగుల కదలికలతో పంటలకు నష్టం వాటిల్లే అవకాశం ఉండటంతో రైతులు, గ్రామస్తుల్లో ఆందోళన నెలకొంది.

గతంలో ఇదే ప్రాంతంలో ఏనుగు దాడిలో సోనాపూర్‌కు చెందిన ఓ వ్యక్తి మృతి చెందడంతో స్థానికుల్లో మరింత ఆందోళన వ్యక్తమవుతోంది. ఏనుగుల కదలికలను అటవీశాఖ బృందాలు నిరంతరం పర్యవేక్షిస్తున్నాయి. ప్రజలు ఏనుగులకు దూరంగా ఉండాలని, వాటిని వెంబడించడం లేదా దగ్గరకు వెళ్లడం చేయవద్దని అధికారులు సూచించారు. ఏనుగులు కనిపిస్తే వెంటనే అటవీశాఖ సిబ్బందికి సమాచారం ఇవ్వాలని కోరారు.