యూపీఐ ఛార్జీల భారం వినియోగదారులపై తక్కువే - ఎన్‌పీసీఐ

రూ.2,000కు మించిన నిర్దిష్ట వాణిజ్య యూపీఐ లావాదేవీలపై అమల్లోకి రానున్న మర్చంట్ డిస్కౌంట్ రేట్‌ (ఎమ్‌డీఆర్‌) ఛార్జీల ప్రభావం వినియోగదారులపై పరిమితంగానే ఉంటుందని నేషనల్‌ పేమెంట్స్‌ కార్పొరేషన్‌ ఆఫ్‌ ఇండియా (ఎన్‌పీసీఐ) ఎండీ, సీఈఓ దిలీప్‌ అస్బే తెలిపారు. ముంబయిలో జరిగిన 13వ ఎస్‌బీఐ బ్యాంకింగ్‌ అండ్‌ ఎకనమిక్స్‌ కాంక్లేవ్‌ 2026లో ఆయన మాట్లాడుతూ.. మొత్తం యూపీఐ లావాదేవీల్లో పరిమాణం పరంగా 96 శాతం రూ.2,000లోపే ఉన్నాయని, వాటిపై ఎమ్‌డీఆర్‌ వర్తించదని చెప్పారు. విలువ పరంగా దాదాపు 75 శాతం లావాదేవీలు కూడా ఛార్జీల పరిధికి వెలుపల ఉంటాయని తెలిపారు.

ఎమ్‌డీఆర్‌ వసూళ్లలో సుమారు 80 శాతం రూ.1,000 కోట్లకు పైగా వార్షిక టర్నోవర్‌ కలిగిన పెద్ద సంస్థల నుంచే వస్తాయని అస్బే వెల్లడించారు. ఇప్పటికే క్రెడిట్‌ కార్డు చెల్లింపులను స్వీకరిస్తున్న ఈ సంస్థలు యూపీఐ ఎమ్‌డీఆర్‌ వ్యయాన్ని భరించే అవకాశం ఉందని పేర్కొన్నారు. దాదాపు 6 కోట్ల మంది డిజిటల్‌ చెల్లింపులు స్వీకరించే వ్యాపారుల్లో సుమారు 75 శాతం మంది రూ.2,000కు మించిన యూపీఐ లావాదేవీలను నిర్వహించలేదని తెలిపారు. ఎమ్‌డీఆర్‌ ద్వారా వచ్చే ఆదాయంలో కొంత భాగాన్ని చిన్న వ్యాపారులకు చెల్లింపు మౌలిక వసతులు, సౌండ్‌బాక్స్‌లు, ఇతర డిజిటల్‌ చెల్లింపు సదుపాయాల అభివృద్ధికి వినియోగించనున్నట్లు చెప్పారు.