తిరుమలలో శ్రీవారి నవరాత్రి బ్రహ్మోత్సవాలు..

తిరుమలలో శ్రీవారి నవరాత్రి బ్రహ్మోత్సవాలు అక్టోబరు 12 నుంచి 20వ తేదీ వరకు వైభవంగా నిర్వహించనున్నారు. ఈ ఉత్సవాల్లో అక్టోబరు 16న గరుడ వాహనం, అక్టోబరు 17న పుష్పక విమానం, అక్టోబరు 19న స్వర్ణరథం, అక్టోబరు 20న చక్రస్నానం ప్రధాన ఘట్టాలుగా నిలవనున్నాయి. నవరాత్రి బ్రహ్మోత్సవాల్లో ధ్వజారోహణం, పెద్ద రథం, ధ్వజావరోహణం ఉండవు. ప్రతిరోజూ ఉదయం 8 నుంచి 10 గంటల వరకు, రాత్రి 7 నుంచి 9 గంటల వరకు వాహనసేవలు నిర్వహిస్తారు. గరుడ వాహనసేవ మాత్రం సాయంత్రం 6.30 నుంచి రాత్రి 11.30 గంటల వరకు జరుగుతుంది.

అక్టోబరు 11న రాత్రి 7 నుంచి 9 గంటల వరకు అంకురార్పణంతో ఉత్సవ కార్యక్రమాలు ప్రారంభమవుతాయి. అక్టోబరు 12న ఉదయం 9 గంటలకు బంగారు తిరుచ్చి ఉత్సవం, రాత్రి 7 గంటలకు పెద్దశేష వాహనం నిర్వహిస్తారు. అనంతరం చిన్నశేష, హంస, సింహ, ముత్యపుపందిరి, కల్పవృక్ష, సర్వభూపాల, మోహినీ అవతారం, గరుడ, హనుమంత, పుష్పక విమానం, గజ, సూర్యప్రభ, చంద్రప్రభ, స్వర్ణరథం, అశ్వ వాహన సేవలు జరగనున్నాయి. అక్టోబరు 20న ఉదయం 6 గంటలకు చక్రస్నానంతో నవరాత్రి బ్రహ్మోత్సవాలు ముగుస్తాయి.