గణేష్ నిమజ్జనానికి టీజీఎస్‌ఆర్టీసీ భారీ ఏర్పాట్లు..

హైదరాబాద్‌లో గణేష్ నిమజ్జనాన్ని దృష్టిలో ఉంచుకుని టీజీఎస్‌ఆర్టీసీ భారీ ఏర్పాట్లు చేసింది. నగరంలో 24 గంటల పాటు 700 ప్రత్యేక బస్సులను నడపనుంది. హుస్సేన్‌సాగర్ పరిసరాల నుంచి ప్రయాణికుల రద్దీకి అనుగుణంగా నిరంతరాయంగా బస్సులను అందుబాటులో ఉంచనున్నారు. మొత్తం 44 కీలక ప్రాంతాల్లో ఆర్టీసీ నియంత్రణ అధికారులను నియమించారు. ట్రాఫిక్ మళ్లింపులను సమన్వయం చేసేందుకు ప్రత్యేక నియంత్రణ కేంద్రాలను ఏర్పాటు చేశారు.

అత్యవసర పరిస్థితులను ఎదుర్కొనేందుకు మూడు ప్రాంతాల్లో ఆర్టీసీ సహాయక వాహనాలను సిద్ధంగా ఉంచారు. బస్సుల్లో తలెత్తే సాంకేతిక సమస్యలకు వెంటనే మరమ్మతులు చేపట్టేందుకు 87 మంది మెకానిక్‌లను అందుబాటులో ఉంచారు. అదనంగా 113 మంది డ్రైవర్లను కూడా సిద్ధంగా ఉంచారు. గణేష్ నిమజ్జనం నేపథ్యంలో ఏపీఎస్‌ఆర్టీసీ, కేఎస్‌ఆర్టీసీ బస్సుల మార్గాల్లోనూ మార్పులు చేయనున్నారు. ప్రయాణికులకు ఎలాంటి ఇబ్బందులు కలగకుండా ప్రత్యేక ఏర్పాట్లతో రవాణా సేవలను కొనసాగించనున్నారు.