సీఎం రేవంత్‌ రెడ్డికి తెలంగాణ రక్షణ సేన చీఫ్ కల్వకుంట్ల కవిత బహిరంగ లేఖ

తెలంగాణ రక్షణ సేన చీఫ్ కల్వకుంట్ల కవిత ముఖ్యమంత్రి రేవంత్ రెడ్డికి బహిరంగ లేఖ రాశారు. రాబోయే జాతీయ జనగణనలో ఓబీసీల కులగణనతో పాటు ఆదివాసీల మతాన్ని ప్రత్యేకంగా నమోదు చేయాలని కోరుతూ అసెంబ్లీ, శాసనమండలి ప్రత్యేక సమావేశాలు నిర్వహించాలని డిమాండ్ చేశారు. డిసెంబర్‌లో ఇంటింటి జనగణన ప్రారంభం కానున్న నేపథ్యంలో ఈ అంశాలపై వెంటనే చర్చించి నిర్ణయం తీసుకోవాలని ఆమె సూచించారు. దేశవ్యాప్తంగా ఓబీసీ సంఘాలు కులగణన కోసం చేస్తున్న ఆందోళనలపై రాష్ట్ర ప్రభుత్వం స్పందించాలని, వారి డిమాండ్లను పరిగణనలోకి తీసుకోవాలని ముఖ్యమంత్రిని కోరారు.

ఆదివాసీలకు ప్రత్యేకమైన జీవన విధానం, సంస్కృతి, సంప్రదాయాలు, మత విశ్వాసాలు ఉన్నాయని కవిత తన లేఖలో పేర్కొన్నారు. గతంలో నిర్వహించిన జనగణనలో ఆదివాసీల మతాన్ని ప్రత్యేకంగా నమోదు చేసిన విషయాన్ని గుర్తుచేస్తూ, రాబోయే జనగణనలోనూ అదే విధానాన్ని కొనసాగించాలని కోరారు. ఇందుకోసం అసెంబ్లీ, శాసనమండలి ప్రత్యేక సమావేశాల్లో తీర్మానం చేసి కేంద్ర ప్రభుత్వానికి పంపించాలని సూచించారు. జనగణన ప్రారంభానికి ముందే ఈ అంశాలపై స్పష్టమైన నిర్ణయం తీసుకోవాలని ఆమె తన లేఖ ద్వారా ముఖ్యమంత్రి రేవంత్ రెడ్డికి విజ్ఞప్తి చేశారు.