రోహిత్ దెబ్బకు బిగ్‌బాస్ ప్లాన్ రివర్స్

బిగ్‌బాస్ తెలుగు సీజన్ 10 ప్రారంభంలోనే టైటిల్ తనదేనని, విజేతగా నిలిచి కప్పు అందుకుంటానని ధీమా వ్యక్తం చేసిన రోహిత్ నాయుడు అనూహ్య ఎలిమినేషన్‌ను ఎదుర్కొన్నట్లు సమాచారం. హౌస్‌లో తన ఆటతో అందరినీ వెనక్కి నెట్టి ఫినాలేకు చేరుకుంటానని, త్రిగుణ్‌ను సైతం దాటుకుని ముందుకు వెళ్తానని గతంలో సవాల్ విసిరాడు. అయితే, ప్రేక్షకుల ఓటింగ్‌కు బదులుగా హౌస్‌మేట్స్ ఓటింగ్ ఆధారంగా రోహిత్‌ను ఎలిమినేట్ చేసినట్లు తెలుస్తోంది. ఈ వారం డబుల్ ఎలిమినేషన్ ఉంటుందని నాగార్జున గత ఎపిసోడ్‌లో ప్రకటించడంతో, ఝాన్సీ, సుధీర్ ఎలిమినేషన్లతో ప్రక్రియ పూర్తయిందని ప్రేక్షకులు భావించారు. కానీ, విన్నర్ రేసులో ఉన్న రోహిత్‌ను కూడా బయటకు పంపినట్లు వస్తున్న వార్తలు ప్రేక్షకులకు షాక్ ఇచ్చాయి.

అయితే, హౌస్ నుంచి బయటకు వచ్చిన తర్వాత అసలు ట్విస్ట్ చోటుచేసుకున్నట్లు సమాచారం. రోహిత్‌కు సీక్రెట్ రూంలోకి వెళ్లి ఆటను కొనసాగించే అవకాశాన్ని నాగార్జున ఆఫర్ చేయగా, అతను దానిని సున్నితంగా తిరస్కరించినట్లు తెలుస్తోంది. ఈ నిర్ణయాన్ని మార్చుకునేలా నాగార్జునతో పాటు బిగ్‌బాస్ టీమ్ పలుమార్లు ప్రయత్నించినట్లు వార్తలు వస్తున్నాయి. రోహిత్ అభిమానులతో మాట్లాడించడంతో పాటు, అతన్ని అగ్నిపరీక్షకు ఎంపిక చేసిన అభిజీత్, అతని తల్లితో కూడా మాట్లాడించే ప్రయత్నం చేసినట్లు సమాచారం. అయినప్పటికీ, తన ఆత్మగౌరవాన్ని వదులుకోలేనని భావించిన రోహిత్ సీక్రెట్ రూం ఆఫర్‌ను అంగీకరించలేదని తెలుస్తోంది. ఈ పరిణామాలకు సంబంధించిన పూర్తి వివరాలు ప్రధాన ఎపిసోడ్‌లో ఎంతవరకు ప్రసారమవుతాయో చూడాలి.