తెలంగాణ ఓటర్ల జాబితాలో భారీ మార్పులు..

తెలంగాణలో ప్రత్యేక సమగ్ర ఓటర్ల జాబితా సవరణ (SIR) ప్రక్రియ పూర్తికావడంతో ముసాయిదా ఓటర్ల జాబితాను నేడు విడుదల చేయనున్నారు. నివేదికల ప్రకారం, రాష్ట్రంలోని సుమారు 73,39,234 మంది ఓటర్ల పేర్లు ముసాయిదా జాబితాలో ఉండకపోవచ్చని తెలుస్తోంది. ఇది మొత్తం ఓటర్లలో 21.70 శాతానికి సమానం. దీంతో తెలంగాణలో మొత్తం ఓటర్ల సంఖ్య దాదాపు 3.38 కోట్ల నుంచి 2.64 కోట్లకు తగ్గే అవకాశం ఉంది. ముసాయిదా జాబితా విడుదలైన తర్వాత తమ పేర్లు, వివరాలు సరిగ్గా ఉన్నాయా లేదా అనే విషయాన్ని ఓటర్లు పరిశీలించుకోవచ్చు.

ఇక మరో 93.7 లక్షల మంది ఓటర్లకు నోటీసులు జారీ చేయనున్నట్లు సమాచారం. ఓటర్ల వివరాల్లో గుర్తించిన లోపాలు, పాత ఓటర్ల జాబితాతో అనుసంధానం కాకపోవడం వంటి కారణాలతో వీరికి నోటీసులు ఇవ్వనున్నారు. అనంతరం ఎన్నికల రిజిస్ట్రేషన్ అధికారులు (EROs) విచారణ చేపట్టి వారి అర్హత, ఓటు హక్కుపై తుది నిర్ణయం తీసుకోనున్నారు. ఈ విచారణలు ఆగస్టు 17 నుంచి అక్టోబర్ 10 వరకు కొనసాగనున్నాయి. ముసాయిదా జాబితాకు సంబంధించిన పూర్తి వివరాలను తెలంగాణ రాష్ట్ర ప్రధాన ఎన్నికల అధికారి సి. సుదర్శన్ రెడ్డి వెల్లడించనున్నారు.