అక్రమాస్తుల కేసులో నిమ్స్‌ అదనపు సూపరింటెండెంట్‌ సస్పెన్షన్‌

ఆదాయానికి మించిన ఆస్తుల కేసులో ఏసీబీకి చిక్కి ప్రస్తుతం కస్టడీలో ఉన్న నిమ్స్‌ అదనపు మెడికల్‌ సూపరింటెండెంట్‌, అదనపు ప్రొఫెసర్‌ డాక్టర్‌ నోరి లక్ష్మీ భాస్కర్‌పై సస్పెన్షన్‌ వేటు పడింది. ఈ మేరకు నిమ్స్‌ డైరెక్టర్‌ డాక్టర్‌ రాహుల్‌ దేవరాజ్‌ ఉత్తర్వులు జారీ చేశారు. గత నెల 22న లక్ష్మీభాస్కర్‌ నివాసంలో రూ.100 కోట్లకు పైగా నగదు, స్థిరాస్తులను గుర్తించిన ఏసీబీ అధికారులు అదే రోజు ఆయనను అరెస్ట్‌ చేశారు.

ఈ నెల 26న ఆయనను కస్టడీకి తరలించగా, 28న సస్పెండ్‌ చేస్తూ నిమ్స్‌ డైరెక్టర్‌ ఉత్తర్వులు జారీ చేశారు. 48 గంటలకు మించి కస్టడీలో ఉన్న ప్రభుత్వ ఉద్యోగిని సస్పెండ్‌ చేయవచ్చన్న తెలంగాణ సివిల్‌ సర్వీసెస్‌ చట్టం, నిమ్స్‌ చట్టం 1989లోని నిబంధనల ప్రకారం ప్రత్యేక అధికారాలతో ఈ ఆదేశాలు జారీ చేసినట్లు తెలిపారు. అరెస్టయిన తేదీ నుంచే సస్పెన్షన్‌ అమల్లోకి వస్తుందని ఉత్తర్వుల్లో పేర్కొన్నారు.