సోమాలియా తీరంలో ఇంధన నౌకపై పైరేట్ల దాడి

సోమాలియా సముద్రపు దొంగలు హైజాక్ చేసిన ఓ ఇంధన నౌకను తమ ఆధీనంలోకి తీసుకునేందుకు భద్రతా బలగాలు చేపట్టిన ఆపరేషన్ సందర్భంగా పైరేట్లు సిబ్బందిపై కాల్పులు జరిపారు. ఈ ఘటనలో ఐదుగురు సిబ్బంది మృతి చెందారు. మృతుల్లో ఒక భారతీయ నావికుడు, ముగ్గురు పాకిస్థానీలు, ఒక మయన్మార్ పౌరుడు ఉన్నారు. మరో భారతీయుడు, ముగ్గురు పాకిస్థానీలు తీవ్రంగా గాయపడ్డారు. ‘ఎంటీ ఆనర్ 25’ అనే ఈ నౌకను 18,500 బారెళ్ల ఇంధనంతో మొగాదీషు వైపు వెళ్తుండగా ఏప్రిల్ 21న సముద్రపు దొంగలు హైజాక్ చేశారు. ఆ సమయంలో నౌకలో మొత్తం 17 మంది సిబ్బంది ఉన్నారు.

నౌకను తిరిగి స్వాధీనం చేసుకునేందుకు పుంట్‌ల్యాండ్ మారిటైమ్ పోలీస్ ఫోర్స్ మంగళవారం ప్రత్యేక ఆపరేషన్ చేపట్టింది. భద్రతా బలగాలు నౌకను చుట్టుముట్టినట్లు గుర్తించిన పైరేట్లు సిబ్బందిపై కాల్పులు జరిపినట్లు తెలుస్తోంది. ఈ దాడిలో ఐదుగురు నావికులు మృతి చెందగా, మరో నలుగురు తీవ్రంగా గాయపడ్డారు. అనంతరం ఎదురుదాడికి దిగిన భద్రతా బలగాలు నౌకను విజయవంతంగా తమ ఆధీనంలోకి తీసుకుని 16 మంది అనుమానిత సముద్రపు దొంగలను అరెస్టు చేసినట్లు యూరోపియన్ యూనియన్ నౌకాదళం తెలిపింది.