హడ్కో రుణంపై ఆర్థిక శాఖ అభ్యంతరం

హ్యామ్ రోడ్ల నిర్మాణానికి హడ్కో నుంచి రోడ్ డెవలప్‌మెంట్ కార్పొరేషన్ తీసుకున్న రుణానికి సంబంధించిన ఫైలు వడ్డీ రేటు విషయంలో ప్రతిష్టంభనకు గురైనట్లు సమాచారం. రోడ్లు, భవనాల శాఖ పరిధిలో హైబ్రిడ్ యాన్యుటీ విధానంలో చేపడుతున్న రహదారి పనులకు కాంట్రాక్టర్లకు మొబిలైజేషన్ అడ్వాన్స్ చెల్లించేందుకు ప్రభుత్వం హడ్కో నుంచి రూ.9,161 కోట్ల రుణం తీసుకోవాలని నిర్ణయించింది. ఈ హ్యామ్ రోడ్ల ప్రాజెక్టులకు హడ్కో రుణం మంజూరు చేసినట్లు తాజా నివేదికలు వెల్లడిస్తున్నాయి.

ఈ రుణంలో ఐదేళ్లలో తిరిగి చెల్లించే మొత్తానికి 8.6 శాతం, 15 ఏళ్లలో తిరిగి చెల్లించే మొత్తానికి 9.12 శాతం వడ్డీని హడ్కో నిర్ణయించినట్లు సమాచారం. హడ్కో, రోడ్ డెవలప్‌మెంట్ కార్పొరేషన్ మధ్య కుదిరిన రుణ ఒప్పందానికి క్యాబినెట్ ఆమోదం అవసరం. అయితే, వడ్డీ రేట్ల విషయంలో ఆర్థిక శాఖ అభ్యంతరం వ్యక్తం చేస్తూ మొత్తం రుణానికి 8.6 శాతం వడ్డీనే ఉండాలని సూచించినట్లు తెలుస్తోంది. దీంతో ఈ రుణానికి సంబంధించిన ఫైలు క్యాబినెట్ సమావేశానికి వెళ్లడం లేదని సమాచారం.