హెచ్-1బీపై కఠిన చర్యలు?

అమెరికాలో హెచ్-1బీ వీసాదారులు ఉద్యోగం కోల్పోయిన తర్వాత ఉండేందుకు ఇచ్చే 60 రోజుల గ్రేస్ పీరియడ్‌ను రద్దు చేసే యోచనలో ట్రంప్ ప్రభుత్వం ఉన్నట్లు సమాచారం. ఇందుకు సంబంధించిన ప్రతిపాదనలను హోంల్యాండ్ సెక్యూరిటీ విభాగం పంపించగా, అవి ప్రస్తుతం ఆఫీస్ ఆఫ్ మేనేజ్‌మెంట్ అండ్ బడ్జెట్ సమీక్షలో ఉన్నాయని తెలుస్తోంది. ఈ నిర్ణయం అమల్లోకి వస్తే ఉద్యోగం కోల్పోయిన వీసాదారులు వెంటనే అమెరికాను విడిచిపోవాల్సిన పరిస్థితి ఏర్పడే అవకాశం ఉంది.

హెచ్-1బీ వీసా నిబంధనల్లో మార్పుల దిశగా ట్రంప్ యంత్రాంగం ఇప్పటికే పలు చర్యలు చేపట్టింది. కొత్త వీసాపై లక్ష డాలర్ల ఫీజు విధించడం తర్వాత ఇప్పుడు గ్రేస్ పీరియడ్ తొలగింపుపై దృష్టి సారించినట్లు సమాచారం. ప్రస్తుతం లేఆఫ్‌లు లేదా ఇతర కారణాల వల్ల ఉద్యోగం కోల్పోయిన వారికి 60 రోజుల సమయం ఉండగా, ఆ సమయంలో కొత్త ఉద్యోగం పొందడం లేదా వీసా హోదా మార్చుకోవాలి. లేకపోతే అమెరికా విడిచిపోవాల్సి ఉంటుంది.