ఫ్లైదుబాయ్ ఘటనపై స్పందించిన నటుడు సోనూసూద్..

ఇటీవల జరిగిన ఫ్లైదుబాయ్ కాక్‌పిట్ ఘటనపై నటుడు సోనూసూద్ స్పందించారు. అత్యవసర పరిస్థితుల్లో కాక్‌పిట్ తలుపును తెరవడంలో ఇబ్బంది ఏర్పడితే బయట ఉన్న అధీకృత సిబ్బంది సహాయం చేసేలా అదనపు భద్రతా వ్యవస్థను తీసుకురావడంపై విమానయాన సంస్థలు ఆలోచించాలని ఆయన సూచించారు. తాజా ఘటనలు విమానయాన భద్రత అనేది ఎప్పటికప్పుడు అభివృద్ధి చెందాల్సిన అంశమని గుర్తుచేస్తున్నాయని ఎక్స్‌లో పేర్కొన్నారు.

అత్యవసర పరిస్థితుల్లో మాత్రమే ఉపయోగించేలా కఠినమైన భద్రతా నిబంధనలతో సీల్ చేసిన ఎమర్జెన్సీ యాక్సెస్ కోడ్‌ను కాక్‌పిట్ వెలుపల ఉన్న ఒక అధీకృత సిబ్బంది వద్ద ఉంచే విధానాన్ని పరిశీలించవచ్చని సోనూసూద్ సూచించారు. దుబాయ్ నుంచి ఇజ్రాయెల్‌కు వెళ్తున్న ఫ్లైదుబాయ్ విమానంలో కాక్‌పిట్‌లో ఘర్షణ చోటుచేసుకోవడంతో సౌదీ అరేబియాలో అత్యవసర ల్యాండింగ్ చేసిన ఘటన నేపథ్యంలో ఆయన ఈ సూచనలు చేశారు. కోపైలట్ విమానాన్ని కూల్చేందుకు ప్రయత్నించడంతో పాటు కెప్టెన్‌ను గాయపరిచినట్లు వచ్చిన వార్తలు అంతర్జాతీయంగా ఆందోళన కలిగించాయి.