ప్రేమ వివాహాలు చేసుకుంటే సామాజిక బహిష్కరణ - హిసార్‌ గ్రామంలో తీర్మానం

హరియాణాలోని హిసార్‌ జిల్లా ఆర్య నగర్‌ గ్రామంలో ప్రేమ వివాహాలకు వ్యతిరేకంగా సామాజిక పంచాయతీ తీర్మానం చేసింది. ఒకే గ్రామానికి చెందిన యువతీ యువకులు పరస్పరం వివాహం చేసుకుంటే సామాజిక బహిష్కరణ విధించాలని, అలాంటి జంటలకు మద్దతు ఇచ్చేవారిపైనా ఇదే తరహా చర్యలు తీసుకోవాలని తీర్మానించినట్లు నివేదికలు పేర్కొన్నాయి. ఆదివారం జరిగిన సమావేశానికి సుమారు వెయ్యి మంది గ్రామస్థులు హాజరయ్యారు.

ఇటీవల గ్రామంలో ఒకే గ్రామానికి చెందిన జంటల మధ్య మూడు వివాహాలు జరగడం ఈ నిర్ణయానికి కారణమని గ్రామస్థులు తెలిపారు. వాటిలో రెండు కులాంతర వివాహాలు కాగా, మరొకటి ఒకే కులానికి చెందిన జంట వివాహం చేసుకున్నట్లు సర్పంచ్‌ రతన్‌ సింగ్‌ తెలిపారు. అయితే ఈ నిర్ణయంతో ఎన్నికైన గ్రామ పంచాయతీకి ఎలాంటి సంబంధం లేదని ఆయన స్పష్టం చేశారు. మరోవైపు, హిసార్‌ పోలీసులు ప్రభావిత జంటలకు భద్రత కల్పిస్తామని తెలిపారు.