తుమ్మిడిహెట్టి ప్రాజెక్టుపై కీలక ముందడుగు..

మహారాష్ట్రకు ప్రతికూల ప్రభావం ఉండకపోతే తుమ్మిడిహెట్టి వద్ద ఆనకట్ట నిర్మాణానికి సంబంధించి గతంలో కుదిరిన ఒప్పందాన్ని పునఃపరిశీలించేందుకు తమకు అభ్యంతరం లేదని ఆ రాష్ట్ర ముఖ్యమంత్రి దేవేంద్ర ఫడణవీస్‌ తెలిపారు. తెలంగాణ నీటి అవసరాలకు సహకరిస్తామని పేర్కొంటూ, కేంద్ర జలసంఘం అధ్యయనంతో పాటు రెండు రాష్ట్రాల అధికారులతో కూడిన సంయుక్త కమిటీ అన్ని అంశాలను పరిశీలించాలని ప్రతిపాదించారు. ముంపు ప్రభావం, ప్రభావిత ప్రాంతాలు, సాంకేతిక అంశాలపై సమగ్ర అధ్యయనం అవసరమని సూచించారు. ముంబైలోని సహ్యాద్రి స్టేట్‌ గెస్ట్‌ హౌస్‌లో తెలంగాణ ముఖ్యమంత్రి రేవంత్‌ రెడ్డి నేతృత్వంలోని బృందం ఫడణవీస్‌తో సమావేశమైంది. ఈ భేటీలో నీటిపారుదల శాఖ మంత్రి ఉత్తమ్‌ కుమార్‌ రెడ్డి, ప్రభుత్వ సలహాదారు రామకృష్ణారావు, రెండు రాష్ట్రాల ప్రధాన కార్యదర్శులు, నీటిపారుదల శాఖ ఉన్నతాధికారులు పాల్గొన్నారు. తుమ్మిడిహెట్టి బ్యారేజీ ఎత్తును 152 మీటర్లకు పెంచడం, నీటి లభ్యత, ముంపు సమస్యలు, ఇతర సాంకేతిక అంశాలపై చర్చించారు.

తెలంగాణ నీటి అవసరాలు, వెనుకబడిన ప్రాంతాల అభివృద్ధి, గిరిజనుల సంక్షేమాన్ని దృష్టిలో ఉంచుకుని 152 మీటర్ల ఎత్తుతో ఆనకట్ట నిర్మాణానికి సహకరించాలని రేవంత్‌ రెడ్డి మహారాష్ట్రను కోరారు. 2016లో కుదిరిన ఒప్పందం ప్రకారం బ్యారేజీ ఎత్తును 148 మీటర్లుగా నిర్ణయించారని, ఆ ఎత్తుతో తెలంగాణ తాగునీరు, సాగునీటి అవసరాలు పూర్తిస్థాయిలో తీరకపోవచ్చని ఉత్తమ్‌ కుమార్‌ రెడ్డి వివరించారు. గ్రావిటీ ద్వారా నీటిని తరలించే అవకాశాలు, ప్రాజెక్టు నిర్వహణ వ్యయాన్ని కూడా పరిగణనలోకి తీసుకోవాలని సూచించారు. మహారాష్ట్రలో ముంపునకు గురయ్యే వ్యవసాయ భూములకు అక్కడి భూసేకరణ నిబంధనలు, పరిహార విధానం ప్రకారం నష్టపరిహారం చెల్లించేందుకు తెలంగాణ సిద్ధంగా ఉందని తెలిపారు. ప్రతిపాదనపై సానుకూలంగా స్పందించిన ఫడణవీస్‌.. తుది నిర్ణయానికి ముందు సాంకేతిక, పర్యావరణ, పరిపాలనాపరమైన అంశాలను అధ్యయనం చేయాలని స్పష్టం చేశారు. తదుపరి సమావేశాలు, వాటి కాలపరిమితులను నిర్ణయించి ప్రాజెక్టును ముందుకు తీసుకెళ్లేందుకు కార్యాచరణ ప్రణాళిక రూపొందించాలని సూచించారు.