మణుగూరు కండక్టర్ ప్రవళిక మృతిపై మంత్రి పొన్నం ప్రభాకర్ తీవ్ర దిగ్భ్రాంతి

మణుగూరు ఆర్టీసీ డిపోకు చెందిన మహిళా కండక్టర్ గుండ్ల ప్రవళిక మృతి పట్ల రాష్ట్ర రవాణా శాఖ మంత్రి పొన్నం ప్రభాకర్, ఆర్టీసీ ఎండీ నాగిరెడ్డి తీవ్ర దిగ్భ్రాంతి వ్యక్తం చేశారు. ఇటీవల ప్రయాణికురాలితో జరిగిన వివాదం సందర్భంగా బస్సు టైర్ల కింద పడి ప్రవళిక తీవ్రంగా గాయపడ్డారు. హైదరాబాద్‌లోని సాయి సంజీవని ఆసుపత్రిలో ఆమెకు మెరుగైన వైద్యం అందించినప్పటికీ ప్రాణాలు కోల్పోయారు. ప్రవళిక కోలుకుని తిరిగి విధుల్లోకి వస్తారని ఆశించామని, ఆమె మరణం తీవ్రంగా కలచివేసిందని మంత్రి, ఆర్టీసీ ఎండీ ఆవేదన వ్యక్తం చేశారు. ఈ ఘటనకు బాధ్యులైన వారిపై కఠిన చర్యలు తీసుకుంటామని స్పష్టం చేశారు. ఈ మేరకు భద్రాద్రి కొత్తగూడెం ఎస్పీతో ఆర్టీసీ ఎండీ నాగిరెడ్డి మాట్లాడారు.

ప్రవళిక కుటుంబానికి ప్రభుత్వం, ఆర్టీసీ అండగా ఉంటాయని మంత్రి పొన్నం ప్రభాకర్ ప్రకటించారు. ఆమె కుటుంబానికి ప్రభుత్వం, ఆర్టీసీ తరఫున రూ.10 లక్షల ఎక్స్‌గ్రేషియా అందించనున్నట్లు తెలిపారు. ప్రవళిక తల్లికి ఉద్యోగం కల్పించడంతో పాటు ఆ కుటుంబానికి ఇందిరమ్మ ఇల్లు మంజూరు చేస్తామని హామీ ఇచ్చారు. కుటుంబాన్ని అన్ని విధాలా ఆదుకుంటామని భరోసా ఇచ్చారు. మరోవైపు, ప్రవళిక మృతికి సంతాప సూచకంగా రాష్ట్రవ్యాప్తంగా అన్ని ఆర్టీసీ డిపోలలో నల్ల బ్యాడ్జీలు ధరించి గేట్ మీటింగ్‌లు, సంతాప సభలు నిర్వహించాలని ఆర్టీసీ యూనియన్లు నిర్ణయించాయి.