ఒక్క ఎకరాతో నెలకు లక్షల్లో ఆదాయం

మహారాష్ట్రకు చెందిన రైతు అర్జున్ సబాలే సంప్రదాయ వ్యవసాయానికి భిన్నంగా అధిక విలువ కలిగిన పూల సాగుతో మంచి ఆదాయం సాధిస్తున్నారు. మనీకంట్రోల్‌ కథనం ప్రకారం, కేవలం ఒక్క ఎకరం భూమిలోనే ఆయన నెలకు దాదాపు రూ.2.5 లక్షల లాభాన్ని ఆర్జిస్తున్నారు. పంటల ఎంపిక, ఆధునిక సాగు పద్ధతులు, మార్కెట్‌ డిమాండ్‌పై అవగాహనతో వ్యవసాయాన్ని లాభదాయకంగా మలుచుకున్నట్లు కథనం పేర్కొంది.

అర్జున్‌ సబాలే పొలంలో ప్రతిరోజూ సుమారు వెయ్యి గులాబీలు, రెండు వేల జెర్బెరా పూలు ఉత్పత్తి అవుతున్నాయి. వాణిజ్య అవసరాలకు అధిక డిమాండ్‌ ఉన్న పూలను సాగు చేయడంతో ఆయనకు మంచి ఆదాయం లభిస్తోంది. యువత వ్యవసాయానికి దూరమవుతున్న సమయంలో అర్జున్‌ విజయగాథ స్ఫూర్తినిస్తోంది. మార్కెట్‌పై అవగాహన, పంటల ఎంపిక, ప్రణాళికాబద్ధమైన సాగుతో వ్యవసాయంలోనూ మంచి ఆర్థిక అవకాశాలు ఉన్నాయని ఈ కథనం చాటిచెబుతోంది.