ఖైరతాబాద్ బడా గణేశుడి నిమజ్జనం పూర్తి..

హైదరాబాద్‌లోని ఖైరతాబాద్‌ బడా గణేశుడి నిమజ్జనోత్సవం ప్రశాంతంగా ముగిసింది. ఈ ఏడాది 69 అడుగుల ‘పంచముఖ సంకటహర మహాగణపతి’గా గణనాథుడు భక్తులకు దర్శనమిచ్చారు. శుక్రవారం ఉదయం 9.30 గంటలకు ఖైరతాబాద్‌ నుంచి ప్రారంభమైన శోభాయాత్ర సెన్సేషన్‌ థియేటర్‌, రాజ్‌దూత్‌ చౌరస్తా, టెలిఫోన్‌ భవన్‌, ఇక్బాల్‌ మినార్‌, తెలంగాణ తల్లి చౌరస్తా మీదుగా ఎన్టీఆర్‌ మార్గ్‌కు చేరుకుంది. అక్కడ ఉత్సవ కమిటీ ప్రత్యేక పూజలు నిర్వహించిన అనంతరం మధ్యాహ్నం 2.15 గంటలకు భారీ క్రేన్ల సాయంతో హుస్సేన్‌సాగర్‌లో నిమజ్జనం పూర్తి చేశారు.

బడా గణేశుడి శోభాయాత్రను వీక్షించేందుకు వేలాదిమంది భక్తులు ఖైరతాబాద్‌ నుంచి ట్యాంక్‌బండ్‌ వరకు తరలివచ్చారు. భక్తుల జయజయధ్వానాలు, ‘గణపతి బప్పా మోరియా’ నినాదాలతో పరిసరాలు మార్మోగాయి. ఎలాంటి అవాంఛనీయ ఘటనలు చోటుచేసుకోకుండా పోలీసులు భారీ బందోబస్తు ఏర్పాటు చేశారు. శోభాయాత్ర ప్రారంభ సమయంలో దానం నాగేందర్‌ మహాగణపతి ఎదుట నృత్యం చేశారు.