అయోధ్య విరాళాల కేసులో బయటపడిన కీలక వివరాలు

అయోధ్య రామమందిరం విరాళాల చోరీ ఆరోపణలపై ప్రత్యేక దర్యాప్తు బృందం (సిట్) దాఖలు చేసిన ఛార్జిషీట్‌లో కీలక వివరాలు వెల్లడయ్యాయి. నగదు లెక్కింపు సమయంలో డబ్బును బయటకు తీసినట్లు ఆరోపణలు ఎదుర్కొంటున్న 105 ఘటనలు సీసీటీవీ కెమెరాల్లో నమోదైనట్లు సిట్ పేర్కొంది. దాదాపు 70 వేల పేజీల ఛార్జిషీట్‌ను ఎనిమిది మంది నిందితులపై దాఖలు చేశారు. విరాళాల నగదు బ్యాంకులకు తరలించే సమయంలో కాకుండా లెక్కింపు ప్రక్రియలోనే మళ్లించినట్లు దర్యాప్తులో తేలిందని సిట్ పేర్కొంది.

దర్యాప్తులో నిందితుల నుంచి రూ.79.85 లక్షల నగదును స్వాధీనం చేసుకున్నారు. బంగారం, వెండి తదితర విలువైన వస్తువులను కూడా స్వాధీనం చేసుకున్నట్లు ఛార్జిషీట్‌లో పేర్కొన్నారు. సీసీటీవీ దృశ్యాలు, సందేశాలు, ఆర్థిక లావాదేవీల వివరాలు తదితర ఆధారాలను సిట్ పరిశీలించింది. ఛార్జిషీట్, సంబంధిత పత్రాల ప్రతులను నిందితులకు అందించాలని కోర్టు ఆదేశించగా, వారు అక్టోబర్ 7న కోర్టు ఎదుట హాజరుకానున్నారు.