సీఎం రేవంత్‌రెడ్డి చేతుల మీదుగా కరీంనగర్ నూతన కలెక్టరేట్ ప్రారంభం...

కరీంనగర్‌లో నూతనంగా నిర్మించిన సమీకృత జిల్లా కార్యాలయాల సముదాయాన్ని సెప్టెంబర్ 30న ముఖ్యమంత్రి ఎ. రేవంత్‌రెడ్డి ప్రారంభించనున్నారు. ఈ కార్యక్రమాన్ని పండుగ వాతావరణంలో నిర్వహించేలా పకడ్బందీ ఏర్పాట్లు చేయాలని రాష్ట్ర రవాణా, బీసీ సంక్షేమ శాఖ మంత్రి పొన్నం ప్రభాకర్ అధికారులను ఆదేశించారు. ప్రధాన ద్వారం, కలెక్టరేట్ భవనం, ముఖ్యమంత్రి పర్యటించే ప్రాంతాలను సుందరంగా అలంకరించడంతో పాటు స్వాగత తోరణాలు ఏర్పాటు చేయాలని సూచించారు.

కలెక్టరేట్ ప్రారంభోత్సవ ఏర్పాట్లపై మంత్రి పొన్నం ప్రభాకర్ ఎమ్మెల్యేలు, జిల్లా అధికారులతో కలిసి సమీక్ష నిర్వహించారు. తెలంగాణ తల్లి విగ్రహావిష్కరణ ప్రాంగణం, సమావేశ మందిరాలు, సీఎం పర్యటించే ప్రాంతాలు, నూతనంగా నిర్మించిన హెలిప్యాడ్‌ను పరిశీలించారు. సీఎం పర్యటన నేపథ్యంలో భద్రత, ట్రాఫిక్ నియంత్రణకు ప్రత్యేక ప్రణాళిక రూపొందించాలని సూచించారు. అన్ని శాఖలు సమన్వయంతో పనిచేసి ఎలాంటి లోటుపాట్లు లేకుండా ఏర్పాట్లు పూర్తి చేయాలని ఆదేశించారు. అనంతరం సీఎం రేవంత్‌రెడ్డి రాజన్న సిరిసిల్ల జిల్లాకు వెళ్లనున్నారు.