త్వరలో కాళేశ్వరం బ్యారేజీల పునరుద్ధరణ – మంత్రి ఉత్తమ్

కాళేశ్వరం ఎత్తిపోతల పథకంలోని మేడిగడ్డ, అన్నారం, సుందిళ్ల బ్యారేజీల సమగ్ర పునరుద్ధరణ పనులను నవంబర్ రెండో వారంలో ప్రారంభించి, 2027 వర్షాకాలానికి ముందే పూర్తి చేస్తామని రాష్ట్ర నీటిపారుదల శాఖ మంత్రి కెప్టెన్ ఎన్. ఉత్తమ్‌కుమార్‌ రెడ్డి తెలిపారు. పునరుద్ధరణ కోసం ప్రభుత్వం రూపొందించిన ప్రణాళికలో గ్రౌటింగ్ ద్వారా పునాదులను బలోపేతం చేయడం, స్టిల్లింగ్ బేసిన్లను పొడిగించడం, కొత్త కట్‌ఆఫ్ గోడలను నిర్మించడం వంటి కీలక పనులు ఉన్నాయని చెప్పారు. వరద ప్రవాహాన్ని నియంత్రించడం, పునాదుల స్థిరత్వాన్ని పెంచడం, నీటి చొరబాటును అరికట్టడం ఈ పనుల ప్రధాన లక్ష్యాలని వివరించారు.

జాతీయ ఆనకట్టల భద్రతా సంస్థతోపాటు ఇతర నిపుణుల సూచనలను పరిగణనలోకి తీసుకుని పునరుద్ధరణ ప్రణాళికను రూపొందించినట్లు మంత్రి తెలిపారు. పుణేలోని కేంద్ర జల, విద్యుత్ పరిశోధనా కేంద్రంలో గణనాత్మక ద్రవ గతి నమూనాల ద్వారా డిజైన్లను పరీక్షిస్తున్నామని చెప్పారు. ఖరారు చేసిన డిజైన్లను అక్టోబర్ 5న న్యూఢిల్లీలో కేంద్ర జల సంఘం ఆధ్వర్యంలోని సాంకేతిక పర్యవేక్షణ కమిటీ ముందు ఉంచనున్నట్లు వెల్లడించారు. భద్రత, నాణ్యత విషయంలో రాజీపడకుండా శాస్త్రీయ అధ్యయనాలు, జాతీయ స్థాయి సాంకేతిక సంస్థల సూచనల మేరకే పనులు చేపడతామని స్పష్టం చేశారు.