రంజీ ట్రోఫీ గెలిచి చరిత్ర సృష్టించిన జమ్ము కశ్మీర్ ఆటగాళ్లకు భారీ నజరానా

దేశవాళీ క్రికెట్‌లో జమ్మూ కశ్మీర్ జట్టు కొత్త చరిత్ర సృష్టించింది. హుబ్బళ్లీలో జరిగిన రంజీ ట్రోఫీ ఫైనల్‌లో ఎనిమిది సార్లు ఛాంపియన్‌గా నిలిచిన కర్ణాటక జట్టును ఓడించి తొలిసారిగా రంజీ టైటిల్‌ను కైవసం చేసుకుంది. ఈ ఘన విజయంతో మొత్తం రాష్ట్రం ఆనందంలో మునిగిపోయింది. ముఖ్యమంత్రి ఒమర్ అబ్దుల్లా స్వయంగా హుబ్బళ్లీకి వెళ్లి మ్యాచ్ చివరి రోజు జట్టును ఉత్సాహపరిచారు.

ఈ చారిత్రక విజయాన్ని పురస్కరించుకుని, సీఎం ఒమర్ అబ్దుల్లా ఆటగాళ్లు మరియు సపోర్ట్ స్టాఫ్‌కు మొత్తం రూ. 2 కోట్ల నగదు బహుమతి ప్రకటించారు. అలాగే, ప్రతిభావంతులైన క్రీడాకారులకు ప్రభుత్వం ప్రత్యేక నియమాల ప్రకారం ఉద్యోగాలు కల్పిస్తామని హామీ ఇచ్చారు. ఈ విజయం జమ్మూ కశ్మీర్ క్రికెట్‌కు కొత్త దిశను చూపిందని, ఇది యువ క్రీడాకారులకు స్ఫూర్తినిస్తుందని ఆయన అన్నారు.

మ్యాచ్ విషయానికి వస్తే, కెప్టెన్ పరస్ డోగ్రా నేతృత్వంలో జమ్మూ కశ్మీర్ జట్టు మొదటి నుంచే ఆధిపత్యం చూపించింది. శుభమ్ పుండిర్ సెంచరీతో జట్టు తొలి ఇన్నింగ్స్‌లో 584 పరుగులు చేసింది. కర్ణాటక తరఫున మయాంక్ అగర్వాల్ 160 పరుగులతో ప్రతిఘటన చేసినా, జమ్మూ బౌలర్ ఆకిబ్ నబీ దార్ 5 వికెట్లు తీసి మ్యాచ్‌ను కశ్మీర్ వైపు మలిచాడు. రెండో ఇన్నింగ్స్‌లో కమ్రాన్ ఇక్బాల్, సాహిల్ లోత్రా సెంచరీలు సాధించడంతో మ్యాచ్ డ్రాగా ముగిసింది. మొదటి ఇన్నింగ్స్ ఆధిక్యం ఆధారంగా జమ్మూ కశ్మీర్ విజేతగా నిలిచింది.