హోర్ముజ్ జలసంధిలో విదేశీ నౌకలపై ఇరాన్ కీలక నిర్ణయం..

అమెరికా-ఇరాన్ మధ్య ఉద్రిక్తతలు కొనసాగుతున్న నేపథ్యంలో వ్యూహాత్మకంగా కీలకమైన హోర్ముజ్ జలసంధిలో విదేశీ నౌకల రాకపోకలపై ఇరాన్ మరిన్ని కఠిన నిబంధనలు తీసుకురావడానికి సిద్ధమవుతోంది. ఇరాన్ పార్లమెంట్‌కు చెందిన నేషనల్ సెక్యూరిటీ అండ్ ఫారిన్ పాలసీ కమిటీ ప్రతిపాదిత చట్టంలోని కొన్ని నిబంధనలకు ఆమోదం తెలిపింది. ఇరాన్ నిర్దేశించిన నిబంధనలను ఉల్లంఘించే విదేశీ నౌకల సరుకులో 20 శాతం లేదా దానికి సమానమైన విలువను జప్తు చేసే అవకాశం ఈ ప్రతిపాదనలో ఉంది. అంతేకాకుండా జరిమానా చెల్లించే వరకు సంబంధిత నౌకలను తాత్కాలికంగా అదుపులో ఉంచేందుకు కూడా అవకాశం కల్పిస్తోంది. హోర్ముజ్ జలసంధికి సంబంధించి శాశ్వత నియంత్రణ వ్యవస్థను ఏర్పాటు చేయాలనే విస్తృత ప్రతిపాదనలో భాగంగానే ఈ చర్యలు చేపట్టినట్లు సమాచారం.

మరోవైపు హోర్ముజ్ జలసంధిలో నౌకల రాకపోకలపై అమెరికా, ఇరాన్ మధ్య భిన్నమైన వాదనలు కొనసాగుతున్నాయి. సెప్టెంబర్ 22న ఐక్యరాజ్యసమితి సర్వసభ్య సమావేశంలో అమెరికా అధ్యక్షుడు డొనాల్డ్ ట్రంప్ మాట్లాడుతూ.. అమెరికా నౌకాదళం హోర్ముజ్ జలసంధి మీదుగా భారీగా చమురు రవాణాను సురక్షితంగా కొనసాగించేందుకు సహకరిస్తోందని తెలిపారు. ఇరాన్‌తో ఒప్పందం కుదిరే అవకాశం ఉందని, అయితే ఒప్పందం జరగకపోతే తీవ్ర చర్యలు తీసుకునే అవకాశం ఉందని కూడా ఆయన వ్యాఖ్యానించారు. ఈ నేపథ్యంలో ఇరాన్ తాజా నిబంధనలు అంతర్జాతీయ షిప్పింగ్, ఇంధన మార్కెట్లపై మరింత దృష్టిని ఆకర్షిస్తున్నాయి. హోర్ముజ్ జలసంధి మీదుగా వాణిజ్య రాకపోకలు కొనసాగుతున్నప్పటికీ, విస్తృత ప్రాంతీయ ఘర్షణ ప్రభావంతో వాటిపై అనిశ్చితి కొనసాగుతోందని తాజా నివేదికలు పేర్కొంటున్నాయి.