హైదరాబాద్ ప్రజా రవాణాకు భారీ ఎలక్ట్రిక్ అప్‌గ్రేడ్...

హైదరాబాద్ నగరంలో పర్యావరణ హిత ప్రజా రవాణా వ్యవస్థను బలోపేతం చేస్తూ టీజీఎస్‌ఆర్టీసీ 500 బస్సుల ప్రాజెక్టులో భాగంగా మరో 60 కొత్త ఓలెక్ట్రా ఎలక్ట్రిక్ బస్సులు అందుబాటులోకి రానున్నాయి. ఈ చివరి దశలో ఈవీ ట్రాన్స్ ప్రైవేట్ లిమిటెడ్ భాగస్వామ్యంతో కూకట్‌పల్లి డిపో నుంచి 12 మీటర్ల లో-ఫ్లోర్ ఎలక్ట్రిక్ బస్సులను ప్రారంభించనున్నారు. ఈ చేరికతో 500 బస్సుల ప్రాజెక్టు పూర్తిస్థాయికి చేరుకుని గ్రీన్ మొబిలిటీకి కీలక మైలురాయిగా నిలవనుంది.

ఈ ప్రాజెక్టులో ఇప్పటికే 450 నాన్-ఏసీ, 50 ఏసీ ఎలక్ట్రిక్ బస్సులు వివిధ డిపోల నుంచి సేవలందిస్తున్నాయి. చివరి 60 బస్సుల చేరికతో రోజువారీ ప్రయాణికుల సంఖ్య సుమారు 1 లక్ష నుంచి 1.2 లక్షలకు పెరిగే అవకాశం ఉంది. జీరో ఎమిషన్ టెక్నాలజీ, ఆధునిక భద్రతా సదుపాయాలు, సౌకర్యవంతమైన సీటింగ్ వంటి లక్షణాలతో ఈ బస్సులు నగర ప్రయాణాన్ని మరింత సౌకర్యవంతంగా మారుస్తున్నాయి.