సీజేపీ నిరసనకు ఢిల్లీలో భారీ భద్రతా ఏర్పాట్లు

చీఫ్‌ ఎలక్షన్‌ కమిషనర్‌ జ్ఞానేశ్‌ కుమార్‌ రాజీనామా చేయాలని డిమాండ్‌ చేస్తూ సీజేపీ అక్టోబర్‌ 10న దిల్లీలోని జంతర్‌ మంతర్‌ వద్ద తలపెట్టిన నిరసన నేపథ్యంలో భద్రతను కట్టుదిట్టం చేశారు. ఢిల్లీలో సుమారు 23 వేల మంది కేంద్ర సాయుధ పోలీసు బలగాల సిబ్బంది, దాదాపు 20 వేల మంది ఢిల్లీ పోలీసులను మోహరించనున్నారు. అక్టోబర్‌ 8 నుంచి 12 వరకు భద్రతా విధుల కోసం కేంద్ర హోంశాఖ 221 కేంద్ర సాయుధ పోలీసు బలగాల కంపెనీలను అందుబాటులో ఉంచింది. ఇందులో 85 కేంద్ర రిజర్వ్‌ పోలీసు బలగాలు, 10 సశస్త్ర సీమా బలగాలు, 7 ఇండో-టిబెటన్‌ సరిహద్దు పోలీసు బలగాలు, 7 ర్యాపిడ్‌ యాక్షన్‌ ఫోర్స్‌, ఒక కేంద్ర పారిశ్రామిక భద్రతా బలగాల కంపెనీ ఉన్నాయి.

దిల్లీ సరిహద్దుల్లోనూ బహుళ అంచెల బారికేడింగ్‌, కట్టుదిట్టమైన నిఘా ఏర్పాటు చేస్తున్నారు. నియంత్రణ గదుల ద్వారా సీసీటీవీ పర్యవేక్షణతో పాటు ముఖ గుర్తింపు కెమెరాలను కూడా వినియోగించే అవకాశం ఉంది. రైల్వే స్టేషన్లు, బస్‌ టెర్మినళ్లు, ఇతర కీలక ప్రాంతాల్లో నిఘా కొనసాగుతుంది. జంతర్‌ మంతర్‌ వద్ద నిరసనకు అనుమతి ఇవ్వలేదని అక్టోబర్‌ 8న ఢిల్లీ పోలీసులు తెలిపారు. అనధికారిక సమావేశాలకు దూరంగా ఉండాలని ప్రజలకు సూచించారు. ఎన్నికల ప్రక్రియలో అవకతవకలు జరిగాయంటూ సీజేపీ చేస్తున్న ఆరోపణలను ఎన్నికల సంఘం, బీజేపీ ఖండించాయి.