లక్ష మంది విద్యార్థులకు ఉచిత ఏఐ శిక్షణ.. మంత్రి శ్రీధర్ బాబు కీలక ప్రకటన

తెలంగాణలో లక్ష మంది విద్యార్థులకు ఉచితంగా ఆర్టిఫిషియల్ ఇంటెలిజెన్స్ (ఏఐ), క్లౌడ్ కంప్యూటింగ్‌లో శిక్షణ అందించనున్నట్లు రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు ప్రకటించారు. ‘తెలంగాణ ఏఐ అండ్ క్లౌడ్ స్కిల్లింగ్ ఇనిషియేటివ్’లో భాగంగా అమెజాన్ వెబ్ సర్వీసెస్ (ఏడబ్ల్యూఎస్) సహకారంతో తెలంగాణ అకాడమీ ఫర్ స్కిల్ అండ్ నాలెడ్జ్ (టాస్క్) ఈ కార్యక్రమాన్ని నిర్వహించనుంది. ప్రభుత్వానికి, కళాశాలలకు, విద్యార్థులకు ఎలాంటి ఆర్థిక భారం లేకుండా ఈ శిక్షణ అందించనున్నారు. ఇందుకు సంబంధించి సోమవారం డాక్టర్ బీఆర్ అంబేడ్కర్ తెలంగాణ సచివాలయంలో టాస్క్, ఏడబ్ల్యూఎస్ మధ్య ఒప్పందం కుదిరింది. రాష్ట్రంలోని 643 టాస్క్ అనుబంధ కళాశాలల్లో ఏఐ, క్లౌడ్ కంప్యూటింగ్, డేటా ఇంజినీరింగ్, మెషిన్ లెర్నింగ్, జనరేటివ్ ఏఐ వంటి పరిశ్రమలకు అవసరమైన సాంకేతిక అంశాల్లో శిక్షణ ఇవ్వనున్నారు.

ఈ కార్యక్రమంలో ఇంజినీరింగ్, సైన్స్ విద్యార్థులతో పాటు ఆర్ట్స్, కామర్స్ వంటి నాన్‌-స్టెమ్ కోర్సుల విద్యార్థులకు కూడా ప్రత్యేక శిక్షణ మార్గాలను అందుబాటులోకి తీసుకురానున్నారు. ప్రాక్టికల్ అనుభవం కోసం ఏడబ్ల్యూఎస్ క్లౌడ్ కన్సోల్ సదుపాయాన్ని కల్పించడంతో పాటు, ప్రతి విద్యార్థికి ఏడబ్ల్యూఎస్ స్కిల్ బిల్డర్ ద్వారా 900కు పైగా డిజిటల్ కోర్సులను ఏడాది పాటు ఉచితంగా నేర్చుకునే అవకాశం కల్పిస్తారు. అంతర్జాతీయ ధ్రువీకరణ పరీక్షలకు రాయితీ వోచర్లు, పరిశ్రమల నిపుణులతో సమావేశాలు, హ్యాకథాన్‌లు నిర్వహించనున్నారు. శిక్షణ విజయవంతంగా పూర్తి చేసుకున్న అర్హులైన విద్యార్థులకు టాస్క్ ఆధ్వర్యంలో ప్రత్యేక ఉద్యోగ మేళాలు నిర్వహిస్తామని మంత్రి తెలిపారు. కళాశాల అధ్యాపకులకు కూడా ఏఐ, క్లౌడ్ టెక్నాలజీలపై ప్రపంచస్థాయి శిక్షణ అందించనున్నట్లు వెల్లడించారు.