ఏపీలో 13 పోలింగ్ కేంద్రాల్లో రీపోలింగ్‌కు ఎలక్షన్ కమిషన్ ఆదేశాలు

ఆంధ్రప్రదేశ్‌లో మున్సిపల్ ఎన్నికల పోలింగ్ సందర్భంగా చోటుచేసుకున్న అక్రమాల ఆరోపణల నేపథ్యంలో రాష్ట్ర ఎన్నికల సంఘం (ఎస్‌ఈసీ) కీలక నిర్ణయం తీసుకుంది. ఐదు జిల్లాల్లోని ఏడు పట్టణ స్థానిక సంస్థల పరిధిలో 13 పోలింగ్ కేంద్రాల్లో సోమవారం రీపోలింగ్ నిర్వహించాలని ఆదేశించింది. ఆదివారం జరిగిన పోలింగ్‌లో బూత్ క్యాప్చరింగ్ జరిగినట్లు వచ్చిన నివేదికల ఆధారంగా ఈ నిర్ణయం తీసుకున్నట్లు ఎన్నికల సంఘం తెలిపింది.

జిల్లాల వారీగా చూస్తే, కడప జిల్లాలో ఎనిమిది, పల్నాడు జిల్లాలో రెండు, అనంతపురం, తిరుపతి, ప్రకాశం జిల్లాల్లో ఒక్కో కేంద్రంలో రీపోలింగ్ జరుగుతోంది. కడప జిల్లాలోని పులివెందుల మున్సిపాలిటీలో నాలుగు పోలింగ్ కేంద్రాల్లోనూ, జమ్మలమడుగు మున్సిపాలిటీలో మూడు కేంద్రాల్లోనూ, కడప మున్సిపల్ కార్పొరేషన్‌లో ఒక కేంద్రంలోనూ తిరిగి ఓటింగ్ నిర్వహిస్తున్నారు. సోమవారం ఉదయం 7 గంటలకు ప్రారంభమైన పోలింగ్ సాయంత్రం 5 గంటల వరకు కొనసాగనుంది. ప్రశాంతంగా ఎన్నికలు జరిగేలా ఆయా ప్రాంతాల్లో భారీ పోలీసు బందోబస్తు ఏర్పాటు చేశారు.