రిలీజ్ డేట్‌తో సంబంధం లేదు.. నిర్మాతలకు సెన్సార్ బోర్డు షాక్

సినిమాల విడుదల తేదీలు దగ్గరపడుతున్నాయనే కారణంతో సెన్సార్ ప్రక్రియను వేగవంతం చేయాలని నిర్మాతలు ఒత్తిడి చేయడంపై సెంట్రల్ బోర్డ్ ఆఫ్ ఫిల్మ్ సర్టిఫికేషన్ (CBFC) కీలక నిర్ణయం తీసుకుంది. ఇకపై రిలీజ్ డేట్‌ను సాకుగా చూపిస్తూ సెన్సార్ ప్రక్రియను త్వరగా పూర్తి చేయాలని కోరడానికి వీల్లేదని స్పష్టం చేసింది. ఈ మేరకు బోర్డు సీఈఓ రాజేంద్ర సింగ్ కఠిన మార్గదర్శకాలతో కూడిన అడ్వైజరీని విడుదల చేశారు. నిర్మాతలు ప్రకటించిన సినిమా లేదా ట్రైలర్ విడుదల తేదీతో సంబంధం లేకుండా, చట్టబద్ధమైన గడువులు, నిబంధనల ప్రకారమే సెన్సార్ కమిటీ సినిమాలను పరిశీలిస్తుందని వెల్లడించారు. ఫైనల్ గ్రాఫిక్స్, బ్యాక్‌గ్రౌండ్ స్కోర్, క్రెడిట్స్, సౌండ్ మిక్సింగ్, సబ్‌టైటిల్స్ వంటి పోస్ట్ ప్రొడక్షన్ పనులన్నీ పూర్తయిన తర్వాతే సెన్సార్ కోసం దరఖాస్తు చేసుకోవాలని సూచించారు. అసంపూర్తిగా ఉన్న సినిమాల కాపీలను సమర్పిస్తే దరఖాస్తులను తిరస్కరిస్తామని హెచ్చరించారు.

అలాగే సెన్సార్ దరఖాస్తులో సినిమా టైటిల్‌ను పేర్కొన్నంత మాత్రాన దానికి అధికారిక ఆమోదం లభించినట్లు కాదని బోర్డు స్పష్టం చేసింది. నిబంధనల ప్రకారం టైటిల్‌ను మార్చే అధికారం ఎగ్జామినింగ్ కమిటీకి ఉంటుందని, సర్టిఫికేట్ వచ్చే వరకు అదే తుది టైటిల్ అని ప్రచారం చేయకూడదని సూచించింది. సినిమాటోగ్రాఫ్ చట్టం, 1952, 2024 నిబంధనలకు అనుగుణంగా సినిమా విడుదల తేదీని దృష్టిలో ఉంచుకుని నిర్మాతలు ముందుగానే సెన్సార్‌కు దరఖాస్తు చేసుకోవాలని ఆదేశించింది. చివరి నిమిషంలో పోస్ట్ ప్రొడక్షన్ పనులు పూర్తి చేసి, హడావిడిగా సెన్సార్ చేయించుకునే నిర్మాతలకు ఈ మార్గదర్శకాలు కొత్త సవాలుగా మారనున్నాయి.